Domowina a Serbski sejm chcetej wčera zahajeny dialog dale wjesć
Budyšin (SN/JaW/at). Domowina a Serbski sejm chcetej přichodnje zhromadnje wotewrjenje a transparentnje wo tym rěčeć, što serbskemu ludej tyje. Zdobom chcetej wobě stronje z jednym hłosom w zajimje Serbow po wšej Łužicy a zwonka njeje agěrować. To je najwažniši wuslědk wčerawšeho prěnjeho oficialneho zetkanja w Budyskim Serbskim domje.
Kaž předsyda třěšneho zwjazka Dawid Statnik a nowinski rěčnik Domowiny Marcel Brauman rozłožištaj, njebě to prěnja rozmołwa Domowiny a sejma. W minjenych lětach stej wobě stronje hižo wjackróć na přikład we wuběrkach Domowiny, na posedźenju jeje zwjazkoweho předsydstwa a samo na hłownej zhromadźiznje wuradźowałoj.