Drježdźanske towarstwo Stup dale twari mosćiki do Delnjeje Łužicy

Drježdźany (SN/MiR). Drježdźanske towarstwo Stup dale swoje skutkowanje z pomocu online-komunikacije dale wjedźe, tak tež spočatk januara na swojej čłonskej zhromadźiznje. „Tam smy so na to dojednali ptači kwas swjećić, tež hdyž nimamy tuchwilu idealne wuměnjenja“, wuswětla předsydka towarstwa Jadwiga Pjacec. Loni běchu dźěći, zdźěla serbsku narodnu drastu zhotowane, muzej w sakskej stolicy kaž tež pjekarnju wopytali, hdźež přijachu słódnu sroku. „To lětsa móžno njeje. Chcemy tuž z pomocu Michała Cyža ptači kwas online swjećić 31. januara wot popołdnja w třoch.“ Swójby móža so na swjedźeń přihotować, zo swoje fota wo pječenju ptačokwasnych dobrotow towarstwu posrědkuja. Přeprošeni su zajimcy z cyłeje Łužicy. Wšako běchu čłonojo towarstwa Stup dale we wobłuku njedawneje zhromadźizny zwěsćili, zo so tež w Delnjej Łužicy zajimuja so z Drježdźanskimi Serbami rozmołwjeć.