Župa Delnja Łužica hłownu zhromadźiznu pod hołym njebjom přewjedła
Groźišćo (HA/SN). Domowinska župa Delnja Łužica ma wot předwčerawšeje soboty noweho župana – dr. Pětša Šurmana. 60lětny je stawiznar w Serbskim instituće, předsyda Maśicy Serbskeje a hižo wot lěta 2008 čłon župneho předsydstwa. Jeho su delegaća a delegatki sobotneje 29. župneje hłowneje zhromadźizny wuzwolili, kotruž wotměchu na njezwučene wašnje pod hołym njebjom na wulkim dworje wjesneho hosćenca w Groźišću (Grötsch) w Picnjanskim hamće.
Nowy župan, kotremuž su přitomni serbsku „Sławu“ zaspěwali, dźakowaše so za dowěru a wuzběhny, zo chce župu krok po kroku zaso do normalneje dźěławosće a žiwjenja wjesć. Sobu najwažnišu rólu při tym hraje, wožiwić delnjoserbsku rěč.
