Prěni Serbski wječork po pandemiji wčera w Nowym Měsće nad Sprjewju
Nowe Město nad Sprjewju (SN/at). To je zwjeselaca powěsć: W Nowym Měsće nad Sprjewju maja dale Domowinsku skupinu, byrnjež wona po čłonstwje mała a tróšku zestarjena była. Na meji wosrjedź wsy banćiki w serbskich barbach zmawuja a njedawno hakle su camprowansku reju nachwatali, kotraž dyrbješe w poprawnym času korony dla wupadnyć. Wo tym bě rěč na Serbskim wječorku wčera w Nowym Měsće nad Sprjewju. Zastupjerjo Domowiny, sakskeje Serbskeje rady, zarjada Załožby za serbski lud a župy „Handrij Zejler“ Wojerecy běchu do wsy wosrjedź lěsa přijěli, zo bychu so wuměnili z čłonkami Domowiny a domizniskeho towarstwa, ale tež wjesnjankami, kotrež čuja so z kulturu a nałožkami našeho ludu zwjazane.
