Budyšin (SN/at). Wuslědki lětušeho Łužiskeho monitora su zajim zastupjerjow serbskich institucijow zbudźili. Na swojim zetkanju wčera w Budyskim Serbskim domje su sej mysle z iniciatoromaj projekta Stefanom Bischoffom, jednaćelom MAS Partners w Lipsku, a dr. Jörgom Heidigom, šefom towaršnosće Prozesspsychologen z Kwětanec (Quitzdorf), wuměnili. Kaž Domowina informuje, je dr. Heidig po čiłej dis­kusiji na dźěłarničku za dalewuwiće Łužiskeho monitora přeprosył. Přichodnje móhli tam dalše serbske aspekty rólu hrać. Judit Šołćina, jednaćelka Domowiny, a dr. Beata Brězanowa, nawodnica Rěčneho centruma WITAJ, přeještej sej na wuslědki nawjazujo přichodne pohłubšenje dopóznaćow wo potencialu Serbstwa za Łužicu. Direktorka Budyskeho Serbskeho muzeja Christina Boguszowa ma za trěbne, zo sej serbske institucije swoje zaměrowe skupiny wuwědomjeja, kotrež přesahuja znate serbske kruhi.