Pančicy-Kukow (SN/MWj). Z Kukowskim hrodźišćom a tamnišim domom Emaws maja w Pančicach-Kukowje wulkotnu městnosć, kotraž so za najwšelakoriše zarjadowanja jara derje hodźi. Cyły zašły tydźeń přebywachu tam Budyske serbske dźěći we wobłuku swojeho nabožneho prózdninskeho tydźenja. Wčera přewjedźe tam Domowinska skupina Pančicy-Kukow swój druhi swójbny swjedźeń.
Runje tak kaž na premjerje w lěće 2019 běchu wčera wonkowne wuměnjenja optimalne. Lětnje temperatury a suche wjedro přiwabichu wjele swójbow z małymi a trochu wjetšimi dźěćimi kaž tež dalšich wopytowarjow na areal nad Klóšterskej wodu. Přišli njeběchu jenož čłonojo skupiny z dźěćimi, ale předewšěm mnohe dalše swójby, a to nic jeno ze wsy, ale tež z druhich kónčin, kaž z Budyšina, Radworskeho Haja, z Miłoćic a wot druhdźe. Wosebje wjeselili so organizatorojo su, zo běchu tež němske swójby přeprošenje sćěhowali.
