Domowina přihotuje wólby serbskich załožbowych radźićelow ze Sakskeje

Choćebuz (SN/at). Zwjazkowe předsydstwo Domowiny namołwja k zapodaću kandidatnych namjetow za wuzwolenje serbskich zastupjerjow ze Sakskeje do rady Załožby za serbski lud za dobu 2023-2027 hač do 1. nowembra. Ze schwalenjom wotpowědneje namołwy je najwyši gremij serbskeho třěšneho zwjazka mjez hłownymi zhromadźiznami na swojim posedźenju minjeny pjatk w Choćebuzu wólbne přihoty zahajił. Namołwa „wusměri so předewšěm na serbske zjednoćenstwa. Tež jednotliwcy smědźa so požadać“, kaž w dokumenće rěka.

Wot 2019 trajaca štyrilětna wólbna doba šěsć serbskich załožbowych radźićelow a jich zastupjerjow so klětu nachila. Štyrjo z nich su ze Sakskeje, dwaj z Braniborskeje. Poslednjeju a jeju zastupjerjow woli Rada za naležnosće Serbow Braniborskeje. Za sakskich Domowina trěbne wólby organizuje a přewjeduje. Zjednoćenstwa runje tak kaž jednotliwcy maja nětko personalne namjety zapodać.