ST Marijina hwězda – ST Lubuš 3:0 (1:0)

Zestawa domjacych: Matik – Wróbl, K. Pakoßnick, Zynda, R. Cyž (79. T. Jurš), Ch. Cyž, Kurink (72. Schmidt), Langer (46. Mjechela), Zelnak, J. Pakoßnick (75. Clausen), D. Jurš

Na šestym hrajnym dnju wokrjesneje ligi powitachu koparjo Marijineje hwězdy na swójskim arealu mustwo z Lubuša. Zašły raz běštej wobě zastupnistwje před tři a poł lětami přećiwo sebi hrałoj. Tehdy dobychu Pančičenjo jasnje ze 6:0. To pak njerěkaše, zo měło tež tónkróć kanterowe dobyće nastać. A tola rěkaše na kóncu tuteje partije 3:0. Běchu to suwerene a zasłužene tři ličaki.

Najprjedy pak so před 65 přihladowarjemi wjele njesta, dokelž so hra jenož mjez šěsnatkomaj wotměwaše. A tak traješe nimale 14. min. hač k prěnjemu přibliženju k wrotam. Po wólnym kopje Bennyja Zyndy přińdźe Jakobus Pawl ­Kurink při pjećmetrowskim rumje k bulej. Jeho třělwa pak wrota misny.