ST Natwar Němske Pazlicy II – ST Marijina hwězda 5:2 (4:0)
Zestawa hosći: D. Matik – Wróbl, K. Pakoßnick, Zynda, Hoge (52. Weclich), Clausen (81. Peschmann), Cyž, Zelnak, Schmidt, Langer (76. Lugge), Eldor (46. Ladewig)
Při za tutón počas njewšědnje wysokich temperaturach podachu so koparjo prěnjeho mustwa Marijineje hwězdy k rezerwje do susodnych Němskich Pazlic. Pola druheho tabulki pokazachu hrajerjo z Pančic-Kukowa znajmjeńša w prěnim wotrězku najšpatniši wukon tuteje sezony. Hižo po třoch mjeńšinach domjacy nawjedowachu. Zamjet na wysokosći srjedźneje linije njemóžeše škit hosći wujasnić. Tak předrě so hrajer přez prawy bok a flankowaše bul dosrjedźa na Sidneyja Czwikla, kiž swobodnje stejo ze sydom metrow přetwori. Krótki čas pozdźišo steješe 2:0. Po róžku něhdyšeho hrajerja Marijineje hwězdy Feliksa Pjetaša móžeše Měrko Kokla bul bjez problemow do wrotow zhłójčkować (11.).