Jubilejne lěto z wopominanjom Korle Awgusta Kocora zakónčili

Zahor (SN/bn). „Namrěwstwo Korle Awgusta Kocora nadal skutkuje, a to nic jenož w Serbach. Wo tym swědča na přikład jeho oratorije a naša hymna. Z dźensnišim spominanjom njeswjećimy jenož jeho narodniny – a sam směm rjec, zo njeběch dotal hišće na dwustoćinach pódla –, ale zakónčimy zdobom jubilejne ‚Lěto Zejlerja a Kocora 2022‘ z wjace hač 30 zarjadowanjemi, kotrychž wjeršk bě bjezdwěla spěwanski swjedźeń w Budyskej ‚Krónje‘. Dźakuju so wšitkim, kotřiž su hódnemu počesćowanju pućrubarjow serbskeje kultury přinošowali.“ Z tymle słowami zahaji předsyda Domowiny Dawid Statnik wopominanje Kocora předwčerawšim w Zahorju, hdźež bě so komponist 3. decembra 1822 narodźił, při tamnišim, jemu wěnowanym pomniku.

Wjesnjanosta Markus Michauk (Wotewrjena lisćina Budestecy) wuzběhny, zo je swoje gmejna „wusko ze serbstwom zwjazana. Rěč drje njeje hižo tak prezentna, smy pak nowu rostlinku sadźili, kotruž hladamy a hajimy.“