Po tym, zo přewjedźechu so w Ralbičan ćěłozwučowarni hižo wot ranja tři dorostowe koparske turněry, zhromadźichu so po tym wječor wot 18 hodź. koparjo Sokoła Ralbicy/Hórki k internemu turněrej. Tón wšak so hižo tradicionelnje kóžde lěto mjez hodami a silwestrom přewjedźe.

Dokelž hišće tójšto dźěći a tež staršich po turněrje młodźiny D w hali wosta, běše trawersa Ralbičanskeje tribuny tež derje pjelnjena. Prjed hač so turněr zahaji, wulosowa trenar prěnjeho mustwa Krystof Gloxyn w kabinje dwaj teamaj muži. Tak nasta čerwjeny a žołty team. Tež stare knjezy stajištaj dwě mustwje a nimo toho tworichu hišće trenarjo juniorow kaž tež młodźina B dalšej cyłkaj.