Zašłu sobotu bě so w Choćebuzu we Łužiskej arenje 13. łužiski brunicowy cup wuhrał. Dohromady wobdźěli so na koparskim turněrje wosom mustwow, mjez nimi tež Serbske mustwo.
Wobdźělene cyłki hraja w krajnej klasy abo krajnej lize, niwow bě tuž dobry. W rjadach Serbow swjećeše młody Chróšćanski wrotar Jakub Škoda swoju premjeru. Prawidłownje hraje w druhim Chróšćanskim mustwje, měješe pak tež hižo krótke zasadźenja pola prěnjeje gardy. Wón je swój nadawk z brawuru zmištrował a so w kóždej hrě přez wuběrne zasadźenje wuznamjeni.
W předkole trjechichu Serbja na FC Gubin, SZ Bórkowy a ST Motor Saspow. Prěnju hru 0:4 přěhrachu. Přez zmylki w defensiwje dóńdźe přećiwnik k wrotam, ale hač krótko do kónca bě partija wurunana. Druhu hru přećiwo SC Motorej Saspow z 0:1 přěhrachu. Serbja njemóžachu wuhrate šansy wužić. W poslednjej hrě přećiwo FC Gubinej mustwo dołho z 1:0 nawjedowaše. Christian Rinza docpě jara zahe nawjedowanje. Hač krótko do kónca wupadaše za tym, zo dobudu. W běhu někotrych mjeńšin zwjertny přećiwniske mustwo hru na 1:2, škoda.