Falowacy zastupowacy załožbowy radźićel ma w požnjencu wuzwoleny być

Budyšin (SN/at). Marlis Pjacec je pjatkowne posedźenje Zwjazkoweho předsydstwa Domowiny přesłapjena wopušćiła. Z interpretaciju „jednoreje wjetšiny hłosow“ při wólbach serbskich čłonow rady Załožby za serbski lud ze Sakskeje 13. januara njebě wona jako tehdy zwrěšćena kandidatka přezjedna. Po wozjewjenju prawniskodohladoweho stejišća přisłušneho sakskeho ministerstwa minjeny štwórtk w našim wječorniku měješe nadźiju, zo Domowina swoju dotalnu poziciju – zo je zwjazkowe předsydstwo při mjenowanych wólbach po interpretaciji jeje prawiznika prawje postupiło –, koriguje. To pak njeje so stało.