ST Ćisk –

ST Radwor 2:0 (0:0)

Zestawa hosći: J. Pěčak – Wjeńka (72. Seiler), Grubert, Šěrak, Reinecke, Schöne (81. L. Pěčak), Nuk, Wjacławk, Omran (65. Glücklich), Schulze, Hetaš (59. Mička)

Za wobaj cyłkaj bě hišće raz wažne pokazać, zo słušatej do wokrjesneje wyšeje ligi­. Hru wobhladało bě sej 170 přihla­dowarjow, wšako dyrbješe domjace mustwo połnje dypkować, zo njeby zestu­piło.

Hosćo započachu jara defensiwnje, tak zo so najprjedy wjele njesta. Wobě mustwje njejstej sej wulke šansy wuhrałoj, při čimž měješe domjace mustwo jasnje wjace wotzamknjenjow před wrotami hosći. Tute pak žanu strašnosć njewuprudźachu. Nowy wrotar Jakub Pěčak kóždu třělwu najprjedy raz porjadnje wotwobara. Najlěpšu šansu prěnjeje połojcy měješe Johannes Wjacławk. Wón bě so na lěwej stronje přesadźił, trjechi pak jenož přećiwniskeho wrotarja. Radwor drje najlěpšu kopańcu njehraješe, wosta pak najprjedy bjez chłostanja. Tak dźěštej cyłkaj z 0:0 do połčasa.