Po jubilejnym 30. wolejbulowym duelu mjez wučerjemi a dwanatkarjemi w minjenym lěće sćěhowaše tydźenja dalši duel.

Cyłkownje běchu pedagogojo 21 razow wuspěšni a tónraz tomu tež tak bě. Woni přesadźichu so w prěnimaj sadźbomaj 25:21 a 25:10 a wotedachu třeći přechod ze 17:25. Partiju je suwerenje sudźił jědnatkar Anton Wićaz a wulki fanowy blok našich maturantow postara so 15. junija popołdnju w sportowni SŠZC Budyšin wo rjanu atmosferu. Spočatk duela při wysokim saku bě hač k stawej 8:8 wurunany. Sćěhowachu dobre nadaća Franza Friedricha a sylne wuspěšne smeše Metoda Šołty k nawjedowanju 13:9 pedagogow. Tutón předskok hač do kónca prěnjeho přechoda zakitowachu.

Druha sadźba so pola dwanatkarjow cyle nimokuli. Start bě skepsany přez mnoho nadaćow zwonka pola, přijimanje bula bě njedokładne. Z tym ćerpješe kwalita přihrawkow. Wučerski blok steješe kaž murja. Wšitko to wjedźeše k jasnemu 10:25 z wida abiturientow.