Hory (GH/SN). Hosćićelka lětušeje dźěłarnički Bjesadow běše předwčerawšim, sobotu, zaso raz skupina z Hór pola Wojerec. Wot lěta 2013 wuhotuja Serbske ewangelske towarstwo a ewangelske Bjesady kóžde lěto tajke zarjadowanje, zo bychu swojich čłonow so dale kubłali a nazhonjenja wuměnili.

Žurla gmejnskeho zarjada gmejny Halštrowska Hola běše z nimale 30 wobdźělnikami resp. hosćemi derje wobsadźena, jako Ramona Wowčerjowa jich w mjenje hosćićelskeje Bjesady witaše a dźěłarničku zahaji. Na spočatku gratulowachu Dieterej Stoppelej z trójnej sławu, dokelž bu dźeń do toho w Budyšinje z čestnym znamješkom Domowiny wu­znamjenjeny.

Za temu dźěłarnički bě Horjanska Bjesada kermušu wuzwoliła. Čłonojo-hosćićeljo rozprawjachu wo nałožkach dokoławokoło serbskeje kermuše we Wojerowskich kónčinach a wo swójskich nazhonjenjach na swójbnych swjedźenjach doma abo pola přiwuznych. Přitomni słyšachu wo wulkich a małych kermušach, wo muskich, wroblowych a wowčich. Runje tak powědachu wo njewšědnej kermušnej jědźi. Wosebity kermušny tykanc móžachu hosćo woptać.