Serbja w třoch župach su wčera wo narodnym žiwjenju wuradźowali

Slepo/Chrósćicy/Malešecy (SN/mb). Rewitalizacija serbšćiny, dobre dźěło skupin a towarstwow a změna strukturow běchu wčera wječor w Slepom najwažniše temy w rozprawje na hłownej zhromadźiznje župy „Jakub Lorenc-Zalěski“. Kaž Diana Maticowa, županka a regionalna rěčnica, našemu wječornikej zdźěli, maja tež w přichodźe wožiwjenje našeje rěče a wutworjenje nowych rěčnych rumow na starosći. Při tym budu dale z Rěčnym centrumom Witaj a rěčnymi motiwatorami Domowiny kooperować. Zdobom chcedźa serbske zarjadnišća na teritoriju župy we wobłuku změny strukturow zdźeržeć a zjawnostne dźěło wuwić.

Składnostnje jubileja dźesać lět załoženja župy su najznaćišeho Serba Slepjanskeho regiona, dołholětneho předchadnika Maticoweje, Manfreda Hermaša, za jeho wulke zasłužby počesćeli. Nachwatał je předsyda Domowiny Dawid Statnik w Serbskim kulturnym centrumje w Slepom přepodaće lětušeho čestneho znamješka Holgerej Mäkelburgej z Trjebina, kiž njemóžeše so na swjatočnym akće w Budyšinje wobdźělić.