Hłowna zhromadźizna Serbskeho ewangelskeho towarstwa so zešła
Budyšin (SN/mb). „Zo tež w serbskej Łužicy nam zjewi swoju radu“, spěwachu wobdźělnicy lětušeje hłowneje zhromadźizny Serbskeho ewangelskeho towarstwa (SET) w prěnim kěrlušu na nyšporu ze serbskim superintendentom Krystofom Rummelom w Michałskej cyrkwi. Eksaktnje dwě hodźinje pozdźišo staj Benjamin Wirth a Elena Quarzowa jako wólbna komisija wuslědki wólbow předsydstwa wozjewiłoj: Přitomni čłonojo su předsydu Mata Krygarja a dalšich pjećoch znowa kandidowacych čłonow předsydstwa w zastojnstwje wobkrućili: Stefana Cušku, dr. Güntera Holdera, Roberta Maćija, Měrćina Wirtha a Güntera Wjenka. Na zwučene wašnje so jim amtěrowacy superintendent přidruža.