ZARI wobkruća zaměr „sto tysac serbowacych w lěće 2100“

Delni Wujězd (SN/mb). „Nadźija njeje srědk managementa“, citowaše dr. Cordula Ratajczakowa wuprajenje Michała Cyža jako wopodstatnjenje za to, zo njemóžeš rewitalizaciju rěče samoběhej přewostajić. Abo kaž Julian Nyča hladajo na serbšćinu praješe: Njedosaha so nadźijeć, „zo změja katolscy Serbja dosć dźěći, z kotrymiž serbuja.“ W projekće ZARI („syći za regionalnu identitu a serbsku rěč“) w nošerstwje Domowiny je Ratajczakowa zhromadnje z prof. dr. Nicole Dołowy-Rybińskej za wědomostny přewod zamołwita. Julian Nyča stara so wo rěčny management kaž na přikład posrědkowanje poskitkow dorosćenym dźiwajo na wosebitosće kóždeho regiona. Startowała je syć ZARI před lětom z tym, zo bu Diana Pawlikowa jako projektna managerka powołana. Srědki ze spěchowanskeho programa „serbska rěč a kultura w změnje strukturow“ za projekty w Sakskej je załožbowa rada dotal hač do kónca lěta 2026 přizwoliła. Wčera wječor witaše Diana Pawlikowa něhdźe połsta zajimcow na zjawnu prezentaciju projekta do wobydlerskeho domu w Delnim Wujězdźe.