Na Domowinsku iniciatiwu chcedźa w Slepom młodźinski klub natwarić

Slepo (SN/MG). Młodźinske kluby su častohdy čiły centrum młodeho wjesneho žiwjenja. Tutu mysl mějachu tež šulerjo Serbskeho šulskeho kompleksa w Slepom, jako wobroćichu so z ideju noweho młodźinskeho kluba na šulskeho so­cialneho dźěłaćerja Franka Stukača. Po nowotwarje šulskeho kompleksa bě so mjenujcy tež něhdyša młodźinska rumnosć „stara jama“ w starej wyšej šuli zhubiła­.

„Młodźinske kluby su přewšo wažne rumy we wsach“, je sebi referentka Domowiny za młodźinu, Virginia Hanuzowa, wěsta. Wona nastorči tuž zhromadnje z projektowej managerku w Slepom, Kati Strukowej, nowy młodźinski klub natwarić. Wčera, srjedu, zahajichu prěnju fazu projekta. W Serbskim kulturnym centrumje zetkaštej so Hanuzowa a Strukowa zhromadnje ze šulerkami a šulerjemi dźewjateho lětnika Slepjanskeje wyšeje šule. Nadawk wuknjacych bě, wosom prašenjow z narokami na nowy klub wotmołwjeć. Z wotmołwami chcedźa zamołwići nětko dalše postupowanje zrealizować.