Budyšin (SN/mb). Štóž je pjatk zwjazkowe předsydstwo (ZP) Domowiny přez livestream widźeć chcył, dyrbješe najprjedy sćerpliwy być: Předsyda Domowiny Dawid Statnik jako nawoda zhromadźizny w Budyskim Serbskim domje je so hakle w 19.14 hodź. na wobrazowce zjewił. W štwórć hodźinje do toho su so njezjawnje personalnym naležnosćach lětušeho plana wěnowali. Štož pak zjawnosć potom z diskusije zhoni, kotraž dwě a běrtlk hodźiny traješe, bě dosć zajimawe.

Z rozprawy županki Diany Wowčerjoweje wo dźěławosći Kamjenskeje župy „Michał Hórnik“ smy zhonili, zo budźe ponowjeny muzej Ćišinskeho w Pančicach drje za dwě njedźeli hotowy. Dotal pak pobrachuje wosoba kaž muzejowy pedagoga, kotryž by wopytowarjow po nim wodźił. Tohodla přihotuja awdijo-wodźenje z natočenym tekstom. Bjarnat Cyž namjetowaše, ze Serbskim muzejom wo tym rěčeć, hač njemóhł so wo Muzej Ćišinskeho jako wotnožku starać. Dawid Statnik skedźbni na zamołwitosć tež za druhe wjesne muzeje. Tohodla je „přidatna personelna struktura“ trěbna, wšako je personal Serbskeho muzeja z dotalnymi nadawkami „dospołnje wućeženy“.