Nazorny dohlad do mnohostronskeje skutkownosće 105 Maćicarjow je lětuša hłowna zhromadźizna wědomostneho towarstwa ze zaměrnym wuhladom do přichoda zwjazała.

Najstarše serbske towarstwo chce w šěršim kole wo swojim přichodźe přemyslować. Tohodla njesłušeja do skupiny „Quo vadis, Maćica Serbska“ jenož čłonojo předsydstwa, ale tež Měto Nowak, Lubina Malinkowa, Theresa Jacobsowa, Cordula Ratajczakowa, Hartmut Leipner, Pětr Dźisławk, Měrćin Brycka a Jadwiga Kaulfürstowa. Kónc lońšeho nowembra su swoje dźěło zahajili; wo mjezystawje je předsydka Maćicy Serbskeje, Anja Pohončowa, na hłownej zhromadźiznje zašłu sobotu informowała.