Štóž je z čłonom gremija Domowiny a za AfD kandiduje, so z tym awtomatisce z woleneje funkcije w třěšnym zwjazku wuzamknje. To je zwjazkowe předsydstwo (ZP) pjatk wobzamknyło.

Budyšin (SN/mb). Zakład za jasne wotmjezowanje je, zo je krajny zarjad za škit wustawy w Sakskej stronu AfD jako wěsće prawicarskoekstremistisku zastopnjował. Rozsud płaći tež za druhe ekstremistiske strony a skupiny. Třo čłonojo ZP, Jan Bělk, Alena Hiccyna a Marja Michałkowa, su so k tomu słowa jimali a namjet podpěrali, doniž njeje gremij jednohłósnje přihłosował. Rjadowanje płaći wot dnja wobzamknjenja.

Dalša wažna tema, kotruž su krótkodobnje na dnjowy porjad wzali: Po dotalnym planje krajneho zarjada za šulu a kubłanje (LaSuB) w přichodnym štwórtym lětniku Serbskeje zakładneje šule „dr. Marja Grólmusec“ w Radworju serbska rjadownja njebudźe (Serbske Nowiny su rozprawjeli). Starši potrjechenych serbskich šulerjow kaž tež čłonojo Staršiskeje iniciatiwy Radwor z.t. su Domowinu a Serbske šulske towarstwo (SŠT) wo podpěru prosyli. ZP žada sej zdźerženje nětčišeje serbskeje rjadownje 3. lětnika.