Drježdźany (SN/mb). „Womłodźenje we wšěch wobłukach fenomenow“ staj sakski minister nutřkowneho Armin Schuster (CDU) a prezident krajneho zarjada za wustawoškit Dirk-Martin Christian na wčerawšej prezentaciji lětneje rozprawy tajneje słužby za 2024 zwěsćiłoj. Z tym na to skedźbnjataj, zo radikalizowanje w scenach prawicarskich a lěwicarskich ekstremistow, ale tež islamistow a antisemitow dale a husćišo hižo pola dźěći a młodostnych so započina. Tohodla so minister praša, hač starobna hranica 14 lět za přepytowanje podhladnych ze stron wustawoškita hišće dosaha.
Christiana starosći, zo so dale a wjac młodych prawicarskich ekstremistow w zjawnosći pokazuje. To su loni w zwisku z protestami přećiwo CSD-manifestacijam queernych, njeheteroseksualnych ludźi zaznawali. W rubrice „subkulturelny a njestrukturowany prawicarskoekstremiski potencial wosobow“ widźimy, zo njebě nihdźe telko wobdźělnikow na anti-CSD-pochodach kaž w Budyšinje (680). Po Šwikawje (480) jewi so na třećim městnje dalše město we wuchodnej Sakskej, Zhorjelc z 460 wobdźělnikami.
