Koalicija z wažnymi rozsudami
Berlin (dpa/SN). Wodźacy zastupnicy CDU/CSU a SPD su so dźensa na mjeztym druhi koaliciski wjeršk po parlamentariskej dowolowej přestawce zetkali. Při konferency w kanclerskim zarjedźe prócowachu so „wo rozsudy w někotrych wažnych naležnosćach“, do zetkanja zdźělichu. W srjedźišću steja reforma wobydlerskeho pjenjeza a financowanja wažnych wobchadnych projektow, kotrež běchu minjeny čas do prašenja stajeli.
Francoska dale w krizy
Paris (dpa/SN). Francoska steji wosrjedź knježerstwoweje krizy před wažnymi rozsudami: Dźensa skónči so doba, w kotrejž měješe wotstupjeny ministerski prezident Sébastian Lecornu chwile, wupuć z krizy namakać. Lecornu bě póndźelu po jenož štyrjoch tydźenjach w zastojnstwje wotstupił, prjedy hač móžeše knježerstwo dźěłać započeć. Móžno je, zo dyrbi na próstwu prezidenta Emmanuela Macrona nowe knježerstwo zestajeć.
Reformaciski dźeń šmórnyć?
Z 1 100 stólcami před Braniborskimi wrotami su tam wčera 2. ...
Prawa policije rozšěrić
Berlin (dpa/SN). Zwjazkowe knježerstwo je dźensa wo tym wuradźowało, rozšěrić prawa zwjazkoweje policije. Při tym dźeše tež wo wotwobaranje trutow. Tole wšak je jenož dźěl wjetšeho modernizowanja mjeztym 30 lět stareho policajskeho zakonja. Swój čas njeběchu truty ani hišće znate. Zrjadować maja so nětko tež prawniske prašenja, na přikład při wotwobaranju trutow nad lětanišćemi a druhimi sensibelnymi objektami.
Kabinet zaběraše so tež z planami ministerki za strowotnistwo Niny Warken (CDU) nastupajo korektury wjele diskutowaneje reformy chorownjow. Nowe rjadowanja maja wjace fleksibelnosće při přesadźenju reformy skićić. Reformu bě hišće amplowa koalicija zahajiła.
Zubnych lěkarjow na wsy słać
Žane wuslědki na konferency wo Gazy
Sharm el Sheich (dpa/SN). Rozmołwy k skónčenju wójny w Gazaskim pasmje njejsu po informacijach wobdźělnikow tež druhi dźeń jednanjow žane wuspěchi wunjesli. Situacija je „přirunujo z prěnim dnjom njezměnjena“, z kruhow diplomatow rěka. Israel a Hamas „kruće na swojich pozicijach wobstawatej“.
Tak žada sej Hamas garantije ze stron Israela, zo wšitke wojerske akcije přećiwo njej tež po pušćenju poslednich zastajencow skónči. Hamas na tym wobstawa, zo Israel wójnu skónči a sta palestinskich jatych pušći. Hakle po tym chce Hamas zastajencow přepodać, kotrychž ma mjeztym dwě lěće w swojich rukach. Israelska delegacija njeje so k tomu wuprajiła.
Dźensa chcychu z rozmołwami na wyšej runinje pokročować. K tomu wočakowachu wurjadneho pósłanca USA Steve Witkoffa. Z nim móhli šansy přiběrać, zo Israel žadanjam Hamas přizwoli.
Němski wonkowny minister Johann Wadephul (CDU) namołwja, optimizm prěnich hodźin jednanjow njezhubić. „Tak móhli skónčnje k wuslědkam přińć.“
Wobaraja so kontroli chatow
Naležna diskusija wo planach EU za bój přećiwo znjewužiwanju dźěći
Berlin (dpa/SN). Unija w zwjazkowym sejmje wupraja so přećiwo kontroli internetnych powěsćow bjez wosebiteje přičiny. „To je, jako by něchtó wšitke listy wočinił a hladał, hač w nich snano něšto zakazaneho njesteji“, rjekny předsyda frakcije CDU/CSU Jens Spahn w Berlinje hladajo na tuchwilnu debatu na runinje Europskeje unije. „To scyła njeńdźe a to z nami móžno njebudźe.“
Přiwšěm je wažne, přećiwo znjewužiwanju dźěći wojować a tole chłostać, rjekny Spahn do posedźenja frakcije. Dowěrliwa indiwiduelna komunikacija ludźi pak měła dale bjez zasahnjenja móžna wostać, sej Spahn žada.
Wjele wuspěcha!
Z wikami na nazymu so nastajili
To a tamne (08.10.25)
Chětro napity šofer wosoboweho awta je so wčera wječor na policajskej straži w mecklenburgsko-předpomorskim Güstrowje přizjewił, dokelž je do dźiwjeho zwěrjeća zrazył. Při protokolowanju podawka zastojnikam napadny, zo je muž dospołnje pjany. Test wunjese 2,43 promilow. Na to wotewzachu jemu krej a jězbnu dowolnosć. Klučiki awta přepodachu žonje. Krótko po tym muž policistam znowa napadny – na kolesu. Tón króć pokazowaše alkomat 2,02 promile.
Nowe předpisy za e-scootery planuje zwjazkowe knježerstwo. Zwjazkowe wobchadne ministerstwo je wotpowědny naćisk wukaza zdźěłało. Tak trjebaja nowe e-scooter wot lěta 2027 směrowe lampki. Města a komuny smědźa přichodnje swójske rjadowanja za wotstajenje rolerow postajić, kotrež internetne platformy ludźom přenajeja.
Knjez hrodźišća ma wušparanja
Hdźe je David Chmelík, kotrehož čěska justica z mjezynarodnym wukazom zajeća pyta (SN su wčera rozprawjeli)? Zašły kónc tydźenja w słowjanskim hrodźišću, praji nam Wětošowski měšćanosta Bengt Kanzler (bjezstronski).
Wětošow (SN/mb). Město Wětošow je wobhospodarja słowjanskeho hrodźišća w Radušu, Davida Chmelíka, hižo wospjet namołwjało, zo ma so přizjewić. Dotal bjez wuspěcha. Chmelík najprjedy w hotelu rezidowaše, doniž njeje do bydlenja w městu přisłušacej wjesce přećahnył. Swoju dotalnu oficielnu adresu w Brüsselu, hdźež je jeho załožba Slavonic Europe zaměstnjena, je wočiwidnje cofnył. Tohodla je wobwodne sudnistwo w Klatovach mjezynarodny wukaz zajeća postajiło, zo bychu jeho na wospjetne sudniske jednanje skazać móhli. Hižo před lětomaj bě čěska platforma novinky.cz wozjewiła, zo su Chmelíka wopačneho wočornjenja wučerjow-mandźelskeju čěskeho a ruskeho pochada dla zasudźili (hlej SN 19.12.2023).
