Iniciatiwy ludźi počesćene
Berlin (dpa/SN). Swjedźeń za swójby zarjadować, wulět organizować abo ludźi na zběranje wotpadkow zwołać – wšitko to zwoprawdźa iniciatiwa Pisany Waltershausen w swojej kulturnej korčmje „Wroblik“. Nětko je projekt, kotryž bě małe durinske město we wubědźowanju „Činić!2025“ zapodało, myto dobyło. Wjace hac 200 projektow ciwilno-towaršnostneho dźěła z wjesnych kónčin wuchodneje Němskeje su w tym wobłuku cyłkownje wuznamjenili, społnomócnjena zwjazkoweho knježerstwa za wuchodne zwjazkowe kraje Elisabeth Kaiser zdźěli.
Mjez prěnimi dźesać mytowanymi bě iniciatiwa „Ležownosć při wodźe za wšěch“ z braniborskeho Eichwalde, kotraž je pobrjóžne pasmo Zeuthenskeho jězora južnje Berlina na wobydlerske zetkawanišćo wutwariła. W sakskim Rychbachu přeprošuje towarstwo „Won na polo“ młodych ćěkancow, zhromadnje kusk pola wobdźěłać.
„Wjesne kónčiny su žiwe, dołhož maja aktiwnych ludźi na městnje“, rjekny politikarka SPD. „To je žiwa demokratija, kotraž towaršnostne styki sylni.“ Wubědźowanje „Činić!“ wotmě so šesty króć.
To a tamne (11.09.25)
Za posudźowanje swójskeje strowoty wužiwa štwórćina ludźi w Němskej mjeztym kumštnu inteligencu. Tole je woprašowanje strowotniskeje poradźowarnje Deloitte wunjesło. Loni bě runje dźewjeć procentow ludźi rjekło, zo praša so w padźe chorosće kumštneje inteligency, mjeztym je jich 25 procentow. Hłowna přičina rozrosta: Kumštna inteligenca je lochko přistupna a na prašenja ludźi spěšne a zrozumliwje wotmołwja.
Hač so nan a syn tola hišće wujednataj? Princ Harry je po informacijach medijow do rezidency swojeho nana krala Charlesa III. w Londonje dojěł. Połdra lěta so nan a syn wjace widźałoj njejstaj. Poměr mjez nimaj je pječa dosć napjaty. Medije spekuluja, zo hotujetaj so mužej w Clarence House traš na rozmołwu, z kotrejž byštaj zwadu skónčiłoj. Pječa je Charles za to swój dowol w Šotiskej přetorhnył.
Komunikaciju wo serbskim ludźe bytostnje polěpšić
Druha dźěłarnička wo komunikaciji a marketingu za serbski lud bě załožba wčera zarjadowała. Pisana skupinka ludźi sej tuž hłowu wo wšelkich temach łamaše.
Budyšin (SN/MG). Załožba za serbski lud bě wčera, wutoru, na dźěłarničku prosyła. Pisana skupinka ludźi, takle rjekny to zamołwita Hanka Budarjowa, so z komunikaciju a marketingom za Serbow zaběraše. Zakład dźěła bě prěnja dźěłarnička wo tutej temje, kotruž su lětsa w měrcu přewjedli. Na jeje zakładźe bě komunikaciska agentura Oberüber-Karger (OK) z Drježdźan tak mjenowany naratiw za serbski lud wuwiwała.
Sakska wospjet najlěpša
Lipsk/Berlin (dpa/SN). Z ekonomiskeje perspektiwy je Sakska ze swojim kubłanskim systemom w lětnym přirunanju z druhimi zwjazkowymi krajemi dale najlěpša. Tole wuchadźa z kubłanskeho monitora dźěłodawarjej bliskeje iniciatiwy Nowe socialne wične hospodarstwo (INSM). Hižo lětsa je Sakska w monitoringu prěnje městno docpěła. Po tym ma Bayerska před Hamburgom a Badensko-Württembergskej najlěpše wuslědki. Poslednje městno je kaž hižo loni Bremen, předposlednje je znowa Braniborska.
We wobłuku studije přepytuja fachowcy na zakładźe 98 indikatorow kubłanske systemy zwjazkowych krajow. Woni hódnoća systemy z kubłanskeho ekonomiskeho wida. Tak wobkedźbuja na přikład wudawki za šulerjow, inwesticije, zastaranski kluč w kubłanišćach, wulkosć rjadownjow, kwotu wotzamknjenjow na šulach abo wobdźělenje na cyłodnjowskich poskitkach. Wosebje sylny je Swobodny stat hladajo na spěchowansku infrastrukturu, kwalitu šule, slědźenje kaž tež integraciju. Nimo toho skedźbnjeja fachowcy na dobre cyłodnjowske hladanje šulerjow.
Noweho premiera powołał
Paris (dpa/SN). Jenož dźeń po powalenju srjedźo-prawicarskeho knježerstwa w Francoskej je prezident Emmanuel Macron dotalneho ministra za zakitowanje Sébastiana Lecornu za noweho ministerskeho prezidenta powołał. 39lětny je wuski dowěrnik Macrona. Lecornu dyrbi nětko ze wšěmi politiskimi mocami narodneje zhromadźizny wuradźować, zo móhli nuznje trěbny etat wobzamknyć. Wjetšinu w parlamenće nichtó nima.
Jastwo na čas žiwjenja
Düsseldorf (dpa/SN). Wyše krajne sudnistwo w Düsseldorfje je za islamistiski terorowy nadpad w Solingenje z třomi mortwymi najwyše móžne chłostanje wukazało. Sudnicy zasudźichu 27lětneho Syričana Issa al Hasana mordarstwa dla k jastwu na čas žiwjenja. Nimo toho rozsudźichu, zo je njeskutk wosebje ćežke złóstnistwo. Tuž dyrbi skućićel po jatbje dale w jastwje wostać. Syričan bě 23. awgusta 2024, na prěnim dnju Solingenskeho měšćanskeho swjedźenja, třoch ludźi z nožom morił a wjacorych zranił.
Iran a UNO so dojednałoj
Francoscy wohnjowi wobornicy wotstronja spalene powostanki z barikady, ...
Berlin zasudźuje nadpad w Kataru
Berlin (dpa/SN). Wonkowny minister Johann Wadephul je israelski nadpad na wodźacych zastupnikow Hamas w Kataru raznje zasudźił. „Nadpad Israela njerani jenož teritorialnu suwerenitu Katara, ale wohrožuje tež wšitke prócowanja za pušćenje zastajencow. Tutón dyr je njeakceptabelny“, rjekny politikar CDU wčera wječor w Berlinje.
Israel bě wčera z wjacorymi lětadłami bydlenski dom nadběhował, w kotrymž wodźacy zastupnicy Hamas runje wuradźowachu. Israelski ministerski prezident Benjamin Netanjahu mjenowaše akciju „preciznu a smjertnu“. Hamas twjerdźi, zo njebu nichtó zranjeny. Katar je najwažniši posrědnik w jednanjach mjez Hamas a Israelom.
EU njepodpěruje dlěje Israel
Cuze truty nad Pólskej wottřělili
Waršawa (dpa/SN). Za čas ruskeho powětroweho nadpada na Ukrainu je so wjace hač dźesać trutow do pólskeho powětroweho ruma zadobyło. „To je akt agresije, kotryž wěstotu wobydlerjow wohrožuje“, wyše rozkaznistwo wójska zdźěla. Pólske wójsko je dźěl trutow wottřěliło.
Po rozprawach wo ruskich trutach w pólskim powětrowym rumje su zamołwići wjacore lětanišća kraja nachwilnje zawrěli, mjez druhim tež Waršawske. W zdźělence pilotam rěka, zo njemóža lětanišćo Waršawa-Chopin „njeplanowanych wojerskich aktiwitow w zwisku ze zaručenjom statneje wěstoty“ wužiwać. Ministerski prezident Donald Tusk je mjeztym wobkrućił, zo je wójsko kraja brónje přećiwo cuzym trutam zasadźiło. Wón sam steji we wuskim kontakće z nawodnistwom wójska, zakitowanskim ministerstwom a prezidentom Karolom Nawrockim, wón zdźěli.
Rjane łónco papjery
Rjenje, zo zaso raz diskutujemy. Hišće rjeńšo, zo smy sej za to zaso eksternych ekspertow skazali. Jich wězo trjebamy, wšako sami kmani njejsmy wo tym rozsudźić, kak w přichodźe wo serbstwje komunikujemy. Nětkole najprjedy raz koncept wudźěłamy, inwestujemy čas, pjenjezy a mysle. Potom sej rjane łónco papjery trójce přečitamy, štyri króć wo nim rěčimy a jón potom po dołhich diskusijach wo njezmysle na hromadu zwrěšćenych idejow zmjetamy. Ale smy so intensiwnje z temu zaběrali. Haj, haj, to je wažne! Snano pak by spomóžne było, hdy njebychu na kokanjach wo přichodźe Serbstwa stajnje jenož wěčnje samsni funkcionarojo a zastupjerjo institucijow sydali. Tajki koncept, kajkiž jón załožba nětko nadźěła, to njeje na sebi špatna wěc. Špatne je, zo serbske institucije jón zaso raz w swójskej jušce warja. Zo tak zakładne nowe ideje a strategije njenastawaja, je móhłrjec jasna wěc.
Maximilian Gruber
