Trump chce z wójnu čakać
Washington (dpa/SN). Prezident USA Donald Trump chce w běhu přichodneju tydźenjow rozsudźić, hač USA poboku Israela přećiwo Iranej do wójny poćahnu. Tuchwilu su hišće dosć dobre wuhlady na wuspěšnje jednanja z Teheranom, zdźěli rěčnica Trumpa. Prezident wuzběhuje wuznam diplomatije, „njeboji pak so, sylnosć pokazać“, wona rjekny. Za nadpad na iranske podzemske atomowe připrawy by Israel pomoc USA trjebał. Dotal USA Israel jenož wojersce podpěruja.
Merz a Netanjahu so rozmołwjałoj
Berlin (dpa/SN). Zwjazkowy kancler Friedrich Merz je z israelskim ministerskim prezidentom Benjaminom Netanjahuwom telefonował a jeho namołwjał, za diplomatiskim rozrisanjom konflikta z Iranom pytać. Rozmołwa traješe něhdźe 20 mjeńšin, z kruhow knježerstwa rěkaše. Merz měješe zrozumjenje za Israel, kiž so móžnemu wobrónjenju Irana z atomowej bombu wobara. Zdobom skedźbni wón na deklaraciju G7, kotraž žada sej diplomatiske iniciatiwy.
UNO skedźbnja na dóńt ćěkancow
Na swojorazne tradicionalne wašnje su wčera w Bayerskej swjedźeń ...
Nowe mjezsobne nadpady
Tel Aviv/Teheran (dpa/SN). Israelske wojerske lětadła su w Iranje wjacore objekty nadpadnyli. Wjace hač 60 lětadłow je minjenu nóc mjez druhim zawody za twar raketow kaž tež hłowny kwartěr slědźenišća atomoweho brónjoweho projekta nadběhowało, israelske wójsko zdźěla.
Iran je runočasnje rakety a truty do směra na Israel třělał. Israel je po swójskich informacijach wjacore iranske truty wottřělił. Mjezynarodni korespondenća rozprawjeja wo škodach we wjacorych israelskich městach. Wočiwidnje njeje israelski rakety wotwobaracy system Iron Dom wšitke iranske rakety wottřělić móhł. Wosebje jara spěšnje lětace rakety su za Israel wulki problem. Wobydlerjo dyrbjachu sej do bunkrow wućeknyć.
Rozprawa budźe zdźěla čornjena
Berlin (dpa/SN). Zwjazkowa ministerka za strowotnistwo Nina Warken chce dotal tajnu přepytowansku rozprawu nastupajo wobstaranje škitnych nahubnikow za čas koronakrizy nětko tola přepytowanskemu wuběrkej předpołožić. Tole je politikarka CDU nowinarjam zdźěliła.
Z přičin datoweho škita pak budu někotre wotrězki čornjene. Tole potrjechi pokazki na wosobinske daty sobudźěłaćerjow a wobchodniske potajnstwa potrjechenych předewzaćow. „Rozprawu bych rady dospołnje wozjewiła. Tole pak prosće njesměm“, ministerka rjekny. Dokument je jenož za zapósłancow mysleny. Transparenca bohužel móžna njeje.“ Rozprawa přepytuje wosebje kupowanje nahubnikow w prěnjej fazy pandemije. Po informacijach medijow je tehdyši zwjazkowy minister za strowotnistwo Jens Spahn (CDU) firmje ze swojeje zapadneje westfalskej domizny při logistice kupowanja pječa nadawki přisuwał.
Žana woborna winowatosć
Wadephul žada sej chutnosć Irana
Berlin (dpa/SN). Zwjazkowy minister za wonkowne naležnosće Johann Wadephul (CDU) žada sej wot Irana wjace chutnosće nastupajo mjezynarodne jednanja wo atomowy program kraja. „Hdyž je Iran chutnje a transparentnje zwólniwy, so atomowych brónjow wzdać, mamy šansu, dalšej eskalaciji wójny zadźěwać. Za to je kóžda rozmołwa zmysłapołna“, rjekny Wadephul sćelakej MDR.
Wadephul je dźensa zhromadnje z wonkownymaj ministromaj Francoskeje a Wulkeje Britaniskeje w šwicarskim Genfje z iranskim wonkownym ministrom Abbasom Araghatschijom rozmołwy wjedł. Dotalne jednanja z Iranom wo toho atomowym programje njeběchu wuspěšne. Wadephul potwjerdźi, zo su USA wusko do jednanjow zapřijate.
Prezident USA Donald Trump je wčera zdźělił, zo chcył w běhu dweju tydźenjow wo tym rozsudźić, hač USA do konflikta mjez Israelom a Iranom wojersce zapřimnu. Israel chce tomu zadźěwać, zo Iran atomowe brónje wuwiwa, kiž móhł přećiwo njemu zasadźeć.
Mjezybilanca w Kamjenicy dobra
Kamjenica (dpa/SN). Hladajo na wulku ličbu wopytowarjow we wustajeńcach a na festiwalach je mjezybilanca zamołwitych europskeje kulturneje stolicy Kamjenicy pozitiwna. „Šěsć měsacow kulturneje stolicy Europy 2025 pokazuja: Kamjenica steji w srjedźišću, narodnje kaž tež mjezynarodnje“, rjekny wyši měšćanosta Sven Schulze (SPD). „Ludźo ze wšeje Europy naše město wopytuja, dožiwjeja tule kulturu, wotewrjenosć a kmanosć k změnam.“ Pozitiwne wuskutki za kulturu a turizm su hižo nětko widźomne, wudospołnja statna ministerka za kulturu a turizm Barbara Klepsch (SPD).
Po zahajenju z wjace hač 80 000 hosćimi srjedź januara poskićichu ludźom dotal wjace hač tysac zarjadowanjow. Něhdźe 115 000 ludźi je njedawno festiwal „Kosmos“ přiwabił, na festiwalu kłobukow zličichu ze 105 000 zajimcami dwójce telko wopytowarjow kaž loni. Tež muzeje rozprawjeja wo přiběracych ličbach wopytowarjow. Wuměłske zběrki w Kamjenicy zličichu hač do meje 61 200 wopytowarjow, loni bě jich w samsnym času runje połojca toho, město zdźěla. Tež industrijny muzej mnohich zajimcow wabi.
To a tamne (20.06.25)
3,6 tonow kokaina w přistawje Southampton we Wulkej Britaniskej su němskich policistow alarmowali. Na to přewodźachu posyłku bananowych kistow do Hamburgskeho přistawa. W składźe we Winsenje wosebity komando policije štyrjoch dealerow zaja, kotřiž chcychu banany wotewzać. Hódnota kokaina wučinja 90 milionow eurow. Njebě to ani hišće najwjetša namakanka: W Hamburgu běchu hižo wo wjele wjace drogow našli.
Wudźěrakow při njezbožach měli po woli najwyšeho wohnjoweho wobornika Němskeje přichodnje krućišo chłostać. „Wudźěrakojo wostanu při zasadźenjach najwjetši problem. To dyrbi so změnić“, rjekny Karl-Heinz Banse. Dotalne pokuty su přeniske. Wón namjetuje, wudźěranje runje tak chłostać kaž telefonowanje za wodźidłom a ludźom nachwilnje jězbnu dowolnosć sćazać. „To najbóle boli.“
Ministrojo rěča z Iranom
Berlin (dpa/SN). Wonkowny minister Johann Wadephul (CDU) kaž tež wonkownaj ministraj Wulkeje Britaniskeje a Francoskeje zetkaja so jutře z wonkownym ministrom Irana Abbasom Araghatschijom. Rozmołwa budźe w Genfje, powěsćernja dpa z diplomatiskich kruhow w Berlinje zhoni. Wadephul je minjene dny krizowe rozmołwy we wjacorych arabskich krajach wjedł, zo by wo so skónčenju wójny mjez Israelom a Iranom wuradźował.
Zaso w domiznje přizemili
Berlin/Tel Aviv (dpa/SN). Lětadło zwjazkoweho knježerstwa je němskich staćanow z jordaniskeje stolicy Ammana do Němskeje přiwjezło. Tući njemóžachu Israel wjace wopušćić. Mašina je wčera wječor w Frankfurće nad Mohanom přizemiła. Dźensa bě dalši lět. Na lisćinach w Israelu čakacych němskich staćanow steji wjace hač 4 000 ludźi. W Iranje nadźijeja so tysacy Němcow na bórzomny nawrót do Němskeje.
Spahn wotpokazuje kritiku
