Mužakow (AK/SN). Mjezu Němskeje a Pólskeje překročacy, 830 hektarow wulki Wjercha Pücklerowy park w Mužakowje chcedźa přichodnje bóle do jednoty splesć. Tole je Cord Panning, jednaćel ­Załožby wjercha Pückleroweho parka, ­minjeny tydźeń w Mužakowje potwjerdźił. Ze swjatočnym zarjadowanjom w Nowym hrodźe su 20lětnu róčnicu přepodaća wopisma UNESCO nastupajo swětowe kulturne herbstwo wopominali. Na dwójnym mosće wotkrychu wopo­minansku taflu. Drježdźanski orchester Residenz zanjese mišterske twórby kla­siskeje hudźby. Panning skedźbni při tej składnosći na nowy managemen­towy plan za dalewuwiće swětoweho kulturneho herbstwa. Po estetiskim zahro­dowym a pomnikoškitnym zwja­zanju wobeju parkow ma nětko tež strukturna jednota sćěhować.

„Dźe wo zjednoćenje administratiwnych strukturow a wo zhromadne postupowanje. Sym přeswědčena, zo so tole radźi“, rjekny Natalia Dzieduszycka, zastupowaca direktorka Narodneho instituta za kulturne herbstwo we Waršawje. Wona Pólsku w załožbowej radźe Mužakowskeho parka zastupuje.