Lětne wudaće Rozhlada skići nimo wuměłskich twórbow serbskeje studentki Rahel Zelnakec tež wuběr literarnych chłóšćenkow a horšć kulturnych přinoškow z pjera dohromady 18 awtorkow a awtorow.
W swojich myslach wo hojenju zaběra so Marie-Charlott Čornakec z bolosćemi ćělneho a duchowneho razu: W kotrej měrje móžemy swójske ćěło při wotchorjenju podpěrać?
Wosebity přinošk wěnuje Jens Buliš 800. róčnicy prěnjeho pisomneho naspomnjenja Chrósćic, kotraž bu lětsa woswjećena. Prawdźepodobnje pak je wjes resp. sydlišćo wo wjele starše. Wón zwjaza stawizny wsy z nabožnymi dopóznaćemi a pleće swoje mysle dale: Wotkal pochadźa rědki patrocinij Chróšćanskeje cyrkwje? Steji tuta woprawdźe na městnje bywšeho pohanskeho kultnišća, a kotry woznam maja sekundarnje zasadźene narowne kamjenje?
