Tójšto fanow kopańcy wuži sobotu wosebitu składnosć kónca tydźenja a dojědźe sej do Kulowa. Tam swjećeše sportowe towarstwo DJK Módro-běli Kulow swój 100lětny jubilej z přećelskej hru přećiwo třećemu ligistej FC Energiji Choćebuz. Duel, kotryž steješe pod hesłom „Módro-běli zetkaja čerwjeno-běłych“, bě za hosćićelow wjeršk jubileja.

Wulke předwjeselo knježeše do podawka w Kulowje. Detlef Scholze, wiceprezident DJK Módro-běłych Kulow, wuzběhny wuznam hry za towarstwo a hrajerjow: „To je highlight towarstwoweho jubilejneho kónca tydźenja a absolutny wjeršk za koparjow našeho cyłka.“ Wón doda, zo drje běchu přihoty za jubilej napinace byli, tola rozmołwy z nawodami Energije Choćebuz běchu na zbožo njekomplikowane a derje rjadowane. „To je prosće wjeselo wobradźało“, tak Scholze.