Smalace słónco, chłódne napoje a dobra nalada: Njedawno su w delnich Sulšecach zaso mócnje swjećili. Tradicionalny wjesny swjedźeń přiwabi mnoho wopytowarjow a wopytowarkow. Sportowy wjeršk bě při tym znowa třělenje jědnatkow, kotrež so hižo 11. raz wotmě.

32 mustwow bě sobotu tydźenja nastupiło, zo bychu so wo požadanu trofeju wubědźowali. Napoł jednej so mustwa na swjedźenišću zhromadźichu, tak zo móžachu dypkownje w 13 hodź. třělenje jědnatkow zahajić. Dokelž so runočasnje na dwoje wrota hraješe, móžachu stajnje štyri mustwa paralelnje nastupić. Kóždy cyłk wobsteješe z pjeć do šěsć hrajerjow/-kow. Štóž bě jenož z pjeć třělcami nastupił, dyrbješe swojeho wrotarja abo wrotarku sobu třěleć dać.