Zwjazkowy sejm wuradźuje wo etaće Němskeje za přichodne lěto
Berlin (dpa/SN). Runje hakle je zwjazkowy sejm etaty jednotliwych ministerstwow za tute lěto wobzamknył. Nětko hižo zaso wo etaće wuradźuja, tónkróć wo financnym planje za 2026.
Etat 2025 běchu po zwrěšćenju amploweje koalicije ze zapozdźenjom wjacorych měsacow schwalili, wón płaći jenož hišće za zbywace tři měsacy lěta. Z etatom 2026 njesmě so tole wospjetować. Zwjazkowe knježerstwo je planam financneho ministra Larsa Klingbeila (SPD) hižo přihłosowało. Nětko so zwjazkowy sejm z nimi zaběra. Jeli so wšitko po časowym planje poradźi, móhł parlament etat 2026 hižo kónc nowembra doskónčnje wobzamknyć. Tak by wón ze spočatkom noweho lěta płaćił.
Klingbeil chce klětu wjace pjenjez wudać hač lětsa, konkretnje 520,5 miliardow eurow (2025: 502,5 miliardow). Jednotliwe ministerstwa bychu rady wo wjele wjace pjenjez k dispoziciji měli, mjez druhim tež wobchadny minister Patrick Schnieder (CDU). Wón chce wjace za wutwar awtodróhow a zwjazkowych dróhow nałožować. Klingbeil jemu radźi, zo ma srědki efektiwnišo zasadźić.
