Zwjazkowe předsydstwo so stawej serbšćiny na šulach wěnowało

Choćebuz (KP/SN/mb). Absolwentce imersiwneho rěčneho projekta Zorja, ­Mira Dubianojc a Karlinka Köhlerojc, buštej pjatk wječor na posedźenju zwjazkoweho předsydstwa (ZP) Domowiny w Choćebuzu jako młodej ekscelency w delnjoserbšćinje wuznamjenjenej. Myto, kotrež je z 5 000 eurami dotěrowane, staj druhi raz nawodnica Rěčneho centruma WITAJ (RCW) dr. Beata Brězanowa a wotrjadnik RCW w Delnjej Łužicy, Bernd Melcher, spožčiłoj. Z wuznamjenjenjom mytuja młodych ludźi, kotřiž su na wurjadne wašnje wysoki rěčny niwow C1 z wotpowědnym certifikatom docpěli. 28lětny Köhlerojc słuša mjeztym do projekto­weho tema Zorja, a 23lětna Dubianojc, kotraž slawistiku studuje, chce najprjedy tež we wukraju słowjanski swět zeznać, ale na kóždy pad do Łužicy so nawróćić a serbšćinu swojim dźěćom dale dać.