Čěscy přećeljo Serbow so na hłownu zhromadźiznu w Praze zešli

Praha (LuNo). W Serbskim seminarje w Praze je so minjenu sobotu hłowna zhromadźizna Towarstwa přećelow Serbow (Společnost přátel Lužice, SPL) wotměła. Tónraz stejachu wobsahi skutkowanja w srjedźišću. Předsyda Lukáš Novosad a jeho zastupjerka Eliška Oberhelová předstajištaj dźěławosć zašłeho lěta a rozprawještaj wo ekskursijach, přednoškach, bjesadach a literarnych čitanjach po cyłej Čěskej kaž tež wo podcastach, kiž su loni zarjadowali a přewjedli. Towarstwo so wuspěšnje prócuje, Łužicu w čěskich medijach prezentować. Tež zhromadne dźěło z Karlowej uniwersitu funguje­, hdźež dale wučbu serbšćiny a někotrych sorabistiskich předmjetow poskićuja. Archiwar Hynek Oberhel w swojej rozprawje naspomni, zo je so poradźiło, cyły archiw SPL rjadować.

Loni je towarstwo najwjetši problem zašłych lět rozrisało, mjenujcy spjelnić wysoke financielne žadanja šulskeho ministerstwa jako mějićela Serbskeho seminara hoberskich kóštow energije dla, štož zwisuje z wójnu w Ukrainje.