Strasbourg (dpa/SN). Liberalnokonserwatiwny załožer Alternatiwy za Němsku (AfD) Bernd Lucke chce přichodne dny rozsudźić, hač w stronje wostanje abo nic. Rozsud, ze strony wustupić, dyrbjał hišće zrawić, rjekny Lucke dźensa wStrasbourgu. Na stronskim zjězdźe minjeny kónc tydźenja w Essenje bě so prawe křidło AfD z Frauke Petry na čole přećiwo njemu přesadźiło. Hač wón nětko zhromadnje z liberalnokonserwatiwnym křidłom nowu stronu załoži, je tema, kotraž „masiwnje na nas přińdźe“. Lucke wobkrući, zo je po wólbnym dobyću Frauke Petry sta čłonow ze strony wustupiło. Hladajo na swoju poražku na wólbnym zjězdźe je wón „wuswobodźeny wot wulkeje ćeže a přesłapjeny, zo je AfD do tohole směra šła“. Stronski kolega Luckeho w Strasbourgu, něhdyši šef zwjazka industrije Hans-Olaf Henkel, je mjeztym ze strony wustupił. Dalši wodźacy zastupnicy su samsny krok připowědźili. Cyłkownje sydom zapósłancow AfD wEuropskim parlamenće chce tam dale dźěłać, kaž rěkaše.

Manila (dpa/SN). Swětowa strowotniska organizacija WHO namołwja kraje swěta, zo dyrbjeli dawki na tobak zwyšić. Dróše twory mnohich wot kurjenja wottrašeja, rěka we wčera předstajenej swětowej rozprawje WHO ke kurjenju. Přemało krajow šansu wužiwa, organizacija kritizuje. Po wšěm swěće je jeničce 33 krajow, kotrež sej telko dawkow na tobak žadaja, zowučinjeja wone tři štwórćiny cyłkowneje płaćizny. Tole je wobjim, kotryž ma WHOza přiměrjeny. W Němskej wučinja podźěl dawkow na tobak mjeztym nimale 75 procentow. Wysoke płaćizny azakoń, po kotrymž njesmě so wot lěta 2009 tobak kupcam, młódšim hač 18 lět, předawać, su podźěl kurjerjow mjez młodostnymi masiwnje pomjeńšili, rjekny zastupnik WHO Kirsten Schotte wManili. Podźěl kurjerjow mjez němskimi młodostnymi w starobje dwanaće do 17 lět je po informacijach zwjazkoweje centrale za strowotniske rozswětlenje minjene dźesać lět wot 23 na dźesać procentow woteběrał. Mjez dorosćenymi kuri w Němskej kóždy štwórty.

Rom (B/SN). Bamž Franciskus je italskich protestantow wo wodaće prosył. „Ze stron katolskeje cyrkwje prošu was wo wodaće za njekřesćanske, haj samo nječłowjeske zadźerženje, kajkež smy my wam napřećo w zašłosći pokazali“, rjekny wón na njedawnym wopyće waldensenskeje cyrkwje w Turinje. Wón je jara dźakowny, zo su poćahi mjez katolikami a waldensenskimi křesćanami mjeztym z respektom a miłosću wupjelnjene. To wuprudźa nadźiju na „połnu a widźomnu jednotu“ mjez křesćanami.

Starosći so wo wobswět

Vatikan (B/SN). Jako prěni bamž w stawiznach cyrkwje wěnuje Franciskus ency­kliku „Laudam si“ (Wo starosći zhro­mad­neho domu) wobswětej. Z wótrymi słowami šwika wón na 220 stronach niča­ce sćěhi kapitalizma a namołwja k wurunanemu žiwjenskemu stilej. Přez „njezamołwitu přetrjebu přirody“ přez čłowjeka maja wosebje chudźi we wuwićowych krajach negatiwne slědy toho njesć. Politikarjam bamž wumjetuje, zo su w prašenjach wobswěta zaprajili. Wón namołwja „kóždeho čłowjeka, kiž na tutym planeće bydli, zo by so wzdał nadměrneho konsuma.“

Nowa frizura sydomlětneho je w Durinskej zasadźenje policije zawinowała. Jako mać hólca minjenu sobotu za nožicami přimny, tón wótře žałosćeše. Susodka zawoła na to policiju. Ta nadeńdźe w bydlenju 41lětnu mać ze synomaj. Młódšemu chcyše wona włosy třihać. „Hólc nochcyše nožicy při hłowje měć“, rěka w rozprawje. Namóc mać tuž njenałožowaše. Wón dyrbi­ nětko „njehotowu frizuru“ znjesć.

Njewšědny swětowy rekord planujetaj Dennis Groißl (30) a Niklas Jahn (21) ze Schleswigsko-Holsteinskeje. Wobaj chcetaj 80 hodźin tenis hrać a tak wobstejacy rekord 61 hodźin dweju Američanow jasnje přetrjechić. Hra započnje so zajutřišim, štwórtk, w 10 hodź. a ma hač do njedźele we 18 hodź. trać. Z wosebitym zežiwjenjom a krótkosparom chcetaj to zmištrować. Dowolena je jenož pjećmjeńšinska přestawka na hodźinu.