Nochcedźa wokrjesnu reformu
Choćebuz/Podstupim (dpa/SN/ch). Braniborski minister za nutřkowne naležnosće Karl-Heinz Schröter (SPD) je dźens dopołdnja w krajnym sejmje swój wótrje diskutowany koncept k wokrjesnej reformje předstajił. Hladajo na woteběrace wobydlerstwo chce braniborske čerwjeno-čerwjene knježerstwo ličbu štyrnaće wokrjesow a štyrjoch bjezwokrjesnych městow na maksimalnje dźesać regionalnych zarjadnistwow redukować. Wyši měšćanosća a zapósłancy Choćebuza, Frankfurta nad Wódru a Brandenburga nad Habolu chcedźa přećiwo planam před krajnym sejmom protestować. CDU žada sej woprašowanje ludu k wokrjesnej reformje, Swobodni wolerjo samo rozsud wobydlerjow.
Woheń lěs zničił
Brüssel/Athen (dpa/SN/K). Dźensa je dźeń wulkich wuradźowanjow. Dźe wo to, kak po njenadźitym jasnym wotpokazanju žadanjow mjezynarodnych pjenjezydawarjow přez grjekski lud zGrjekskej dale wobchadźeć.
Rom (B/SN). Bamž Franciskus je italskich protestantow wo wodaće prosył. „Ze stron katolskeje cyrkwje prošu was wo wodaće za njekřesćanske, haj samo nječłowjeske zadźerženje, kajkež smy my wam napřećo w zašłosći pokazali“, rjekny wón na njedawnym wopyće waldensenskeje cyrkwje w Turinje. Wón je jara dźakowny, zo su poćahi mjez katolikami a waldensenskimi křesćanami mjeztym z respektom a miłosću wupjelnjene. To wuprudźa nadźiju na „połnu a widźomnu jednotu“ mjez křesćanami.
Starosći so wo wobswět
Vatikan (B/SN). Jako prěni bamž w stawiznach cyrkwje wěnuje Franciskus encykliku „Laudam si“ (Wo starosći zhromadneho domu) wobswětej. Z wótrymi słowami šwika wón na 220 stronach ničace sćěhi kapitalizma a namołwja k wurunanemu žiwjenskemu stilej. Přez „njezamołwitu přetrjebu přirody“ přez čłowjeka maja wosebje chudźi we wuwićowych krajach negatiwne slědy toho njesć. Politikarjam bamž wumjetuje, zo su w prašenjach wobswěta zaprajili. Wón namołwja „kóždeho čłowjeka, kiž na tutym planeće bydli, zo by so wzdał nadměrneho konsuma.“
Nowa frizura sydomlětneho je w Durinskej zasadźenje policije zawinowała. Jako mać hólca minjenu sobotu za nožicami přimny, tón wótře žałosćeše. Susodka zawoła na to policiju. Ta nadeńdźe w bydlenju 41lětnu mać ze synomaj. Młódšemu chcyše wona włosy třihać. „Hólc nochcyše nožicy při hłowje měć“, rěka w rozprawje. Namóc mać tuž njenałožowaše. Wón dyrbi nětko „njehotowu frizuru“ znjesć.
Njewšědny swětowy rekord planujetaj Dennis Groißl (30) a Niklas Jahn (21) ze Schleswigsko-Holsteinskeje. Wobaj chcetaj 80 hodźin tenis hrać a tak wobstejacy rekord 61 hodźin dweju Američanow jasnje přetrjechić. Hra započnje so zajutřišim, štwórtk, w 10 hodź. a ma hač do njedźele we 18 hodź. trać. Z wosebitym zežiwjenjom a krótkosparom chcetaj to zmištrować. Dowolena je jenož pjećmjeńšinska přestawka na hodźinu.