Ličba serbskich wosadnych je skerje snadnuška mjez nimale 46 000 ewangelskimi křesćanami w cyrkwinskim wobwodźe Budyšin-Kamjenc EVLKS. Pod cyrkwinsko-politiskim aspektom to rólu njehraje. Signal, kotryž je krajny biskop Tobias Bilz ze swojimaj rozmołwomaj ze Serbskim wosadnym zwjazkom a Serbskim ewangelskim towarstwom a dźeń do toho z Domowinu, wusyłał, je jasny: Sakska krajna cyrkej steji serbskim ewangelskim wěriwym poboku. Po słowach krajneho biskopa je EVKLS zdobom jara wažne, zo wona prócowanja wo našu maćeršćinu dale spěchuje. Poselstwo rady přijimujemy. Swójske starosće pak móža tajke tamneho być. Podpěra za rěč tež młodźi fararjo su. Tajcy w serbskich kaž němskich wosadach pobrachuja. Tydźeń trajaca wizitacija krajneho biskopa měješe serbskej terminaj a Božej słužbje ze serbskimi elementami. Organizatoram je so poradźiło, hosćej z Drježdźan wosebitosć cyrkwinskeho wobwoda wuwědomić. Axel Arlt

Cyłkownje 2 094 přeńdźenjow nastupajo předpisanu spěšnosć je policija w Braniborskej we wobłuku marathona błyskačow minjeny pjatk zwěsćiła. Na akciji bě so 286 zastojnikow wobdźěliło, kotřiž na 131 městnach w zwjazkowym kraju spěšnosć šoferow kontrolowachu. Loni bě tam při 74 000 wobchadnych zražkach 11 000 ludźi znjezbožiło, 108 smjertnje.

Metalowe platy na železniske kolije połožili su njeznaći njedaloko dwórnišća w Rotenburgu na sewjerowuchodźe Delnjeje Sakskeje a su tak ćah wobškodźili. Na lokomotiwje a na kolijach nasta škoda wjacorych dźesaćitysacy eurow. 24lětny lokomotiwnik bě ze swojim ćahom regionalneho předewzaća Metronom krótko po wopušćenju dwórnišća přez 23 kilogramow ćežke dźěle zjěł. Nichtó ze 600 pasažěrow w ćahu so njezrani. Policija pyta za swědkami.

Budyšin (SN/MiR/mb). Wot 1. meje přichodneho lěta maš w Němskej wjace prawa, swójbne mjeno po swojej woli hamtsce zapisać dać. Wosebitosće po tradicijach na přikład w serbskim ludźe abo w friziskej ludowej skupinje móža so z tym wobkedźbować. Tak maja serbske žony prawo, kóncowku -ec abo -owa w hamtskich dokumentach wužiwać.

Marja Michałkowa je sej hižo w 1990tych lětach jako zapósłanča Zwjazkoweho sejma žadała, serbske mjena w oficialnych dokumentach wužiwać móc. Za nju je prawo na pisanje swójskeho mjena prašenje swobodneho rozsuda. „Nichtó nima prawo, někomu w tym zwisku předpisy činić.“ Kelko Serbow a Serbowkow budźe w přichodźe nowe prawo wužiwać? Wona měni: „Myslu sej, zo skerje młodźi ludźo zajim pokazuja.“

Berlin (dpa/SN). Bywši prezident zwjazkoweje tajneje słužby BND Gerhard Schindler liči po zajeću dweju pozdatneju ruskeju spionow w Bayerskej z dalšimi hišće njewotkrytymi padami. Aktiwity ruskeje tajneje słužby njeje žane překwapjenje, ale jenož „kónčk lodowca“, rjekny wón nowinarjam. Spionaža a sabotaža słuša do gratu ruskeje geopolitiki, runje w časach wójny. W Bayerskej běchu dweju muži zajeli, kotrajž běštaj tam wojerske objekty USA wuskušowałoj.

Mustwo spřisahanych zestajene

New York (dpa/SN). W procesu płaćenja pjenjez mjelčenja dla přećiwo bywšemu prezidentej USA Donaldej Trumpej su mustwo spřisahanych zestajeli. Po tři dny trajacym woprašowanju dojednachu so statne rěčnistwo, prawiznicy Trumpa a sudnik Juan Merchan na dwanaće spřisahanych. Hižo póndźelu chcedźa proces z prěnimi pledoyerami zahajić. Trumpej wumjetuja, zo je dokumenty falšował, tón twjerdźi, zo je njewinowaty

Swobodnej dnjej miliny dla