Spěwna skupina Přezpólni a dorostowy orchester Konserwatorija Heinricha Schützeho Drježdźany stej minjeny pjatk pod hesłom „Serbski adwent“ zhromadny koncert w sakskej stolicy wuhotowałoj. W nimale wupředatej Drježdźanskej Cyrkwi třoch kralow zamóštej publikum ze serbskimi ludowymi a hodownymi spěwami pohnuć. Kaž moderatoraj Fabian Kaulfürst a Milko Kersten wuzběhnyštaj, bu program přewažnje z pěsnjow zestajany, kotrež „w historiskich žórłach drěmotaja“. Tajkele „zasypanki“ takrjec wožiwić a je předstajiwši připosłucharjam dobru naladu wobradźić je Přezpólnym z „dušinej naležnosću“. Foto: Jürgen Männel

11. hodownika 1898 zemrě w Choćebuzu delnjoserbski farar a narodny prócowar Pawoł Fryco Broniš. Wón bě wot lěta 1873 hač do smjerće archidiakon serbskeje cyrkwje w bywšim klóštrje delnjołužiskeje metropole. Narodźi so 9. smažnika 1830 jako syn serbskeho fararja w Jasenje. Po studiju teologije w Berlinje započa swoju cyrkwinsku słužbu 1855 w Picnju jako diakon. Štyri lěta po tym bu w Lutolu blisko Choćebuza jako farar zapokazany. Najdlěši čas fararješe potom w Choćebuzu. Jako student a diakon w Picnju basnješe a přełoži Johanna Wolfganga Goethowu baladu „Der Erlenkönig“ do delnjoserbskeje rěče. W Lutolu přełoži z dalšimi duchownymi bibliju do delnjoserbšćiny. W Choćebuskim času bě Pawoł Fryco Broniš wosebje aktiwny, wuda 1876 „Kjarliže k spěwanju“ a spisa „Na šesty maj“. Wón bě předsyda Towarstwa serbskich stu­dentow. 1880 załoži sobu delnjoserbsku Maśicu Serbsku a bě čłon jeje předsydstwa. Na Choćebuskim gymnaziju wuwučowaše něšto lět serbšćinu, doniž pruske kultusowe ministerstwo serbsku wučbu njezakaza. Wón žadaše sej w zjawnosći a před statnymi institucijemi nałožowanje serbskeje rěče.

Dobra nalada knježeše na wulěće sobudźěłaćerjow Ludoweho nakładnistwa Domowina pod nawodom jednaćela Symana Pětra Cyža pjatk do Drježdźan. Prěnja stacija běše krajny sejm, hdźež so po plenarnej žurli rozhladowachu a šefredaktor Serbskich Nowin swoje bywše dźěłowe městno pokaza. Potom dachu sej atmosferu na srjedźowěkowskich adwentnych wikach na dworje hrodu lubić, doniž na łódźi na Łobju při rjanej bjesadźe w kruhu kolegowkow a kolegow njewječerjachu. Jednaćel so wšěm za dobre zhromadne dźěło dźakowaše. Přiwšěm mějachu zbožo: Ćah z Budyšina njebě wot stawkowanja lokomotiwnikow potrjecheny. Foto: SN/Bojan Benić

Budyšin (SN/bn). „Wie ein Mittelpunkt entsteht“ rěka najnowša w Ludowym nakładnistwje Domowina wušły zwjazk rjadu „Sorbische Bibliothek“. Zběrka wopřijima cyłkownje 22 prozowych tekstow dohromady 14 awtorkow a awtorow. „Zaměr tohole rjadu bě a je, literaturu serbskich spisowaćelow spřistupnić němskemu čitarstwu. Z nowej zběrku, kotraž je zdobom prěnja antologija rjadu, podawamy dohlad do tudyšeje prozy, nastateje w minjenych třoch lětdźesatkach. Wuběrajcy teksty – klasiske powědančka, ale tež literariske portrety, eseje a tak dale – wukopachu so prašenja za identitu, pochadom a změnu jako centralne ćežišća. Serbskim awtoram bě dźensa wšudźe jewjaca so ‚změna strukturow‘ w mjenowanej dobje z wobstajnej temu“, wudawaćelka nowinki Marka Maćijowa na wčerawšej knižnej premjerje w Smolerjec kniharni rozłoži. Dźewjeć přinoškow „wozjewja so prěni raz w němčinje“, wjacore z nich buchu ekstra za zběrku zněmčene.