Budyšin (SN). Něhdźe 800 wuměłcow z pjeć krajow wuhotuje we wobłuku 13. mjezynarodneho dujerskeho swjedźenja wot jutřišeho hač do njedźele dohromady 30 koncertow w Budyšinje a na wjacorych městnach wokrjesa. Před 26 lětami wot spěchowanskeho kruha Budyskeho młodźinskeho dujerskeho orchestra do žiwjenja zwołany je so Mjezynarodny swjedźeń hudźby w měsće a wokrjesu z rjanej tradiciju stał. Štóž rady na dujersku hudźbu w klasiskej, ale tež modernej formje słucha, njeměł tule składnosć skomdźić.
Róžant. Prěnja změna wujasnjenskich wustawkow za Šunow budźe jedna z temow přichodneho posedźenja gmejnskeje rady Ralbicy-Róžant jutře, štwórk, we 18.30 hodź. w sydarni Róžeńčanskeje wjesneje rady. Nimo toho porěča radźićeljo wo dodatnych wustawkach „Róžant – Při studničce“ a schwala hospodarski plan za lěto 2017.
Njebjelčicy. Tohorunja jutře, ale hakle w 19.30 hodź. schadźuja so čłonojo gmejnskeje rady Njebjelčicy w tamnišej sydarni. Nimo někotrych twarskich naležnosćow w Pěskecach, Serbskich Pazlicach a Miłoćicach rozjimaja radźićeljo mjez druhim podružne zrěčenje mjez towarstwom Kamjenjak a Njebjelčanskej gmejnu. Wobě zhromadźiznje stej zjawnej, wobydlerjo su tuž přeprošeni.
Přeprošatej na rozmołwu
Budyšin. Načolna kandidatka Lěwicy Katja Kipping a direktna kandidatka strony za wólby Němskeho zwjazkoweho sejma we wólbnym wokrjesu Budyšin I Caren Lay přeprošatej wobydlerjow jutře, pjatk, wot 17.30 do 19 hodź. na wosobinsku rozmołwu na swoje čerwjene křesło, kotrež budźe na Budyskich Žitnych wikach stać. Tam změja zajimcy składnosć, wo politiskich temach so rozmołwjeć a so wo zaměrach Lěwicy wobhonić.
Hórki (SN/MiR). W słowakskej gmejnje Terchová wotměja wot 3. do 6. awgusta „Jánošíkove dni“. Tam chcedźa sej mnozy Serbja z busom dojěć, mjez nimi sobustawojo skupiny Čłonstwo za integraciju ludoweje akordeonoweje kultury. Mjeztym 55. mjezynarodny folklorny festiwal je pomjenowany po rubježniku Juraju Jánošíku (1688–1713), kotrehož maja Słowacy za narodneho rjeka.
Jězbu přihotujetaj mandźelskaj Brita a Volkmar Šołćic z Hórkow. „Předewšěm chcemy sej folklorne poskitki na festiwalnišću wobhladać. Za runje tak wažne wšak mamy, tež našu serbsku kulturu z hudźbu a spěwom prezentować.“ We wobłuku wuprawy chcedźa sej pućowacy hrodaj Oravskí a Bojnice kaž tež rězbarjeny Slovenský betlehem w Rajeckej Lesnej wobhladać. Přenocować budu w hotelu „Slovakia“ w Žilinje.
Hišće su někotre swobodne městna. Płaćizna za jězbu nima 150 eurow přesahać. Zajimcy, kotřiž chcyli sobu jěć, móža so pola Šołćic pod telefonowym čisłom 035796/ 95 012 přizjewić.