Dźesać čłonow Domowinskeje skupiny Pančicy-Kukow je so wčera při pomniku Jakuba Barta-Ćišinskeho w Lipju wo porjad ­starało. Zhromadnje lisćo hrabachu a pomnik wučisćichu. Runje jako so dešćować započa bě wšo zdokonjane. Nimo ­dojutrowneje akcije skupinarjo tule kóžde lěto hišće raz do klóšterskeho a swójbneho swjedźenja rjedźa. Foto: Marian Wjeńka

Přijeće z wustajeńcu fotografijow

Mittwoch, 29. März 2023 geschrieben von:

Praha (SN). Na přijeću do nalěća zastupnistwa Swobodneho stata Sakskeje w Praze staj so jednaćelka Domowiny Judit Šołćina a referent za wukraj Clemens Škoda wčera we Łužiskim seminarje wobdźěliłoj. Přiležnostnje staj so zdobom ze zastupjerjemi předsydstwa towarstwa Společnost přátel Lužice (SPL) rozmołwjałoj.

Wobě stronje wjeseleštej so wo zakónčenym projekće rewitalizacije Hórnikoweje knihownje, w kotrymž su knihi wuspěšnje restawrowali a digitalizowali. W štyrilětnym projekće, wot sakskeje statneje kenclije ze 160 000 eurami spěchowanym, su čłonojo SPL mjez druhim rukopisne zběrki „Serbowka“ we wysokej kwaliće digitalizowali. Wot nětka su tute zjawnosći pod w manuscpritoriumje, na mjezynarodnym portalu za digitalizaty Narodneje knihownje Čěskeje přistupne.

Domowinskemu žiwjenju w měsće ­Budyšinje bě w rozprawje předsydstwa na hłownej a wólbnej zhromadźiznje župy „Jan Arnošt Smoler“ minjenu ­sobotu w tudyšim Serbskim domje cyły wotrězk wěnowany.

Budyšin (SN/at). Generaciski problem Domowinskich skupin, kotrež na teritoriju města Budyšina skutkuja, je wočiwidny. Wopisowanje struchłeho połoženja nowe njeje. Tři skupiny po słowach nowowuzwoleneje županki Leńki Thomasoweje „hišće wobsteja, ale aktiwna je jenož hišće Domowinska skupina 3“. Jeje areal běše prěnjotnje wuchodne předměsto z Brechtowej a Becherowej. Tam so skupinske předsydstwo pod nawodom Měrćina Wornarja najebać postupjenu starobu njemało akterkow a akterow „prawi­dłownje schadźuje, zhromadne wulěty a zhromadźizny přewjeduje“, přitomni na hłownej zhromadźiznje zhonichu.

Europeadu 2024 dźensa předstajili

Dienstag, 28. März 2023 geschrieben von:

Flensburg (jh/SN). W historiskim domje Flensborghus w Flensburgu wotmě so dźensa nowinarska konferenca za Europeadu. Wona budźe klětu wot 28. smažnika do 7. pražnika w němsko-danskej namjeznej kónčinje pod hesłom „Mjez morjomaj“, wšako leža hrajne městna mjez Sewjernym a Baltiskim morjom.

Zastupjer přihotowanskeho wuběrka „Serbske mustwo – Europeada 2024“ w Flensburgu drje přitomny njebě, za to pak online starosta Serbskeho Sokoła Milan Funka. Projektowy nawoda Ruwen Möller wo přihotach informowaše. Hrajne městna w Němskej a Danskej hišće jasne njejsu, dokelž maja ličbu přizjewjenjow dočakać. Přizjewjenski čas běži hač do 1. meje. Wšitcy štyrjo wuhotowarjo – Sintojo a Romojo w Schleswigsko-Holsteinskej, Frizojo, Němcy w Sewjeroschleswigskej a Danojo w Južnoschleswigskej – chcedźa žónske mustwo přizjewić. Po informacijach referenta Dowowiny Clemensa Škody serbskej cyłkaj žonow a muži hišće přizjewjenej njestej, dokelž pobrachuje přizwolenje spěchowanskich srědkow. Skupinow wulosować chcedźa lětsa w Flensburgu.

Mjez rubiškom a Ćišinskim

Dienstag, 28. März 2023 geschrieben von:

Župa „Michał Hórnik“ tež lětsa ze šěrokim spektrumom dźěławosće

Chrósćicy (SN/mb). Župa „Michał Hórnik“ Kamjenc ze swojim skutkowanjom za serbsku katolsku narodnu drastu pokročuje: Nětko na dźěłarničku „škrobjenje rubiška“ přeprošuja. Zarjadowanje so štwórtk, 20. jutrownika, w 18 hodź. na farje w Chrósćicach wotměje. Zajimče ­njech so w regionalnym běrowje Domowiny přizjewja (tel. 035796 96254 abo ). W lěće 2020 je župa po wuradźowanjach hotowarničow doporučenja za wužiwanje katolskeje narodneje drasty wozjewiła. Hakle loni nazymu su so na zetkanju hotowarničow z wuznamom jednotliwych dźělow drasty zaběrali.

Dale chce župa šulerjam wyšeju šulow na swojim teritoriju projektne dny w domje Měrćina Nowaka-Njechorńskeho w Njechornju zmóžnić – z financnej podpěru při kóštach za transport. Hižo do jutrow budźe tajka wuprawa šulerjow z Ralbičanskeje wyšeje šule. Pozadk je, zo aktualnje „KuBiMobil“ kulturneho ruma Hornja Łužica-Delnja Šleska šulam tajku podpěru njeskići.

Ze žónskim zapalom na čole Budyskeje župy

Montag, 27. März 2023 geschrieben von:

Budyšin (SN/at). Ze županku Leńku Thomasowej, městožupanku Borboru Felberowej a z generaciskej změnu w předsydstwje poda so Domowinska župa „Jan Arnošt Smoler“ Budyšin do hač do lěta 2026 trajaceje noweje wólbneje doby. Woni buchu na župnej hłownej a wólbnej zhromadźiznje předwčerawšim w Budyskim Serbskim domje z přeswědčacym wotumom delegatow wuzwoleni.

Serbske nalětnje pućowanje

Montag, 27. März 2023 geschrieben von:
Dešćojte wjedro njeje wosom pućowarjow wottrašiło, so pjatk z Trjebina přez lěsne pućiki Trjebinskeho zwěrjenca do Běłeje Wody podać. Rěčna motiwatorka Juliana Kaulfürstowa a rěčespytnik Hync Rychtaŕ běštaj serbske słowa a sady kołowokoło hole, łuki a zwěriny přihotowałoj, wšako chcychu so wobdźělnicy ducy w serbšćinje wukmanić. Na schowanych blečkach pokazowaše jim Kito Pjeńk z Rownoho wosebite a rědke rostliny. Leksiku z kulinariskeho wobłuka zwučowachu pućowarjo pozdźišo w Běłowodźanskej korčmje. To je wuběrna móžnosć, serbšćinu raz na cyle hinaše wašnje zwonka powołanja wužiwać, běše facit wobdźělnikow. Foto: Juliana Kaulfürstowa

Starosća so duchowneho dorosta dla

Mittwoch, 22. März 2023 geschrieben von:

Towarstwo Cyrila a Metoda, katolske zjednoćenstwo z přewšo šěrokej paletu skutkowanja, je wčera w Baćonju swoju kóždolětnu hłownu zhromadźiznu přewjedło – z nowym předsydu na čole.

Baćon (SN/MkWj). Čłonojo towarstwa běchu loni w meji Cyrila Hančika z Radworja jako naslědnika zasłužbneho Jurija Špitanka za noweho předsydu wuzwolili. Nowy nawoda bilancowaše wčera w połnje wobsadźenej žurli Baćonskeje fary skutkowanje towarstwa minjeneho lěta, kotrež bě po nanuzowanej přestawce dweju lět koronawirusa dla zaso w normalnych kolijach běžało. Cyril Hančik chcył wustawki towarstwa z nimale 200 čłonami změnić, dokelž njewotpowěduja po 25 lětach wjace žadanjam časa. Na přichodnej hłownej zhromadźiznje chcedźa wo změnach wuradźować a je schwalić. Starosće ma towarstwo předewšěm přiběracych wudawkow zwyšenych płaćiznow dla, Hančik rozłoži.

Šěroke polo skutkowanja Towarstwa Cyrila a Metoda pokaza so w rozprawach cyłkownje dźesać sekcijow a korporacijow, kotrymž móžeše Damian Dyrlich jako nawoda wčerawšeje zhromadźizny słowo přepodać.

Maćica doporuča změnu hymny

Montag, 20. März 2023 geschrieben von:

Budyšin (SN/bn). „Diferenca mjez spisownej a wobchadnej serbšćinu njeměła nadal rozrosć. Měli wobchadnu rěč připóznać a ju we wučbje wobjednawać.“ Tónle facit na kóncu přednoška Leńki Šołćic „Róla wobchadneje rěče w modernym swěće“, z kotrymž rěčespytnica předwčerawšim na žurli Budyskeho Serbskeho muzeja hłownu zhromadźiznu Maćicy Serbskeje (MS) zahaji, zbudźi mjez něhdźe 40 přitomnymi čiłu diskusiju. Tezy, zo woznamjenja jeje dopóznaća „zwrěšćenje serbskeje šulskeje politiki minjenych 60 lět“, Šołćic z ramjenjomaj sukajo přihłosowaše. Wupuć móhł po jeje měnjenju być „na přikład dowolić artikle a njeobligatoriski dual“. Ze slědowacym přednoškom „Prócowanja Maćicy wo serbske pomniki“ bilancowaše Trudla Malinkowa „wuspěšne skutkowanje pomnikoweho wuběrka MS po wožiwjenju towarstwa w lěće 1991“. Zdobom wona připowědźi, zo so wotpowědna sekcija lětsa rozpušći, dźěl jeje nadawkow ma přichodnje fachowa přirada Załožby za serbski lud wukonjeć. Za jeje wjelelětny angažement spožčichu Trudli Malinkowej čestne čłonstwo MS.

Ze swěta njeje

Montag, 20. März 2023 geschrieben von:
Zjawnosći spřistupnjeny wutk z rozprawy prawniskeho wuběrka Zwjazkoweho předsydstwa Domowiny nastupajo tematiku zastojnstwo a mandat za načolnych zastupjerjow serbskeho třěšneho zwjazka je plista wšěm tym, kotrymž je nahladnosć Domowiny wažna. So jeničce na Zakładny zakoń powołać, rěka, zo ma so čłonstwo w přichodźe tež z tym wotnamakać, hdyž Domowinu reprezentowaca wosoba za AfD mandat nastupi abo so samo w scenje reichsbürgerow na wusahowacym městnje angažuje. Běchu čłonojo prawniskeho wuběrka snano přežadani, zo njejsu linije móžnych konfliktow jasnje pomjenowali? Abo njejsu to chcyli? Naležnosć měsac do hłowneje zhromadźizny Domowiny ze swěta njeje. A to bě dobra přičina, ju tohodla minjeny pjatk zboka kóždeježkuli zjawnosće rozjimać. Nadźija na moralku je snadnuška. Hdyž dźe jenož hišće wo taktiku, moralka podrjadowanu rólu hraje. Abo budźe dospołnje na bok stłóčena. Axel Arlt

Neuheiten LND