Hórki (SN/MiR). Sedźi-li wjace hač 250 ludźi w Hórkach zhromadnje za blidami, da to rěka, zo wotměwa Serbske šulske towarstwo swój kóždolětny swójbny swjedźeń. Tomu wčera zaso tak bě. Nalada bě wulkotna, tež hdyž njebě so wjedra a mnohich dalšich zarjadowanjow we wokolinje dla telko ludźi zešło kaž lěta do toho.

Zahajili běchu swój swjedźeń z nyšporom. Farar Měrćin Deleńk njebě sej chorosće dla do Hórkow dojěć móhł. Předsydka SŠT Ludmila Budarjowa pak rjekny, zo „smy jako katolscy Serbja na tule mału pobožnosć přihotowani“. Z wjacorymi spěwami a modlitwami za staršich a dźěći bě nutrnosć dostojne zahajenje. Při slědowacej swačinje zetkachu so kubłarki ze wšelakich dźěćacych dnjowych přebywanišćow w nošerstwje SŠT. Starši wužichu składnosć bjesady.

Posedźenje jurya konstituowanje

Freitag, 11. August 2017 geschrieben von:
Budyšin (SN). Na žurli Budyskeho Serbskeho domu zeńdźe so jutře, sobotu, w 10 hodź. jury młodźinskeho wubědźowanja „Přimaj so gratu! – młodźina.akcija.zabawa“. Zdobom budźe tam konstituowace posedźenje serbskeje młodźinskeje přirady. Na tymle dopoł­dnju předstaja młodostni swoje najwšelakoriše ideje za projektne přede­wzaća. Jury, wobstejaca ze serbskich młodostnych, rozsudźi wo tym, štó k dispoziciji stejace pjenjezy dóstanje a z tym swój projekt hač do kónca tohole lěta zwoprawdźi. Předewzaće spěchuja partnerstwa za demokratiju, Swobodny stat Sakska a program zwjazkoweho ministerstwa za swójby „Demokratiju žiwy być“. Zajimcy su na zjawne zarjadowanje wutrobnje witani.

Tež w Nowej Wjesce rejwansku skupinu měli

Mittwoch, 09. August 2017 geschrieben von:

Nimale před 60 lětami bu w Nowej Wjesce­ serbska rejwanska skupina załožena.­ Wo njej pak dźensa jenož mało­ ludźi wě. Składnostnje 400. róčnicy wobstaća wsy je sobuzałožer a bywši rejwar skupiny Měrćin Wagner z Radwo­rja swoje dopomnjenki na 15 stronach znosył a je tež w swojej ródnej wsy Nowej Wjesce na njedawnym swjedźenju­ předstajił. Rady přiwozmje Radworčan dalše wudospołnjenja. Serbske Nowiny dokumentuja tule někotre­ dopomnjenki Wagnera na Nowowješćansku rejwansku skupinu.

1956 wotmě so w Budyšinje Druhi zjězd Serbow, na kotrymž bu tež nowy Serbski dom na Budyskim Póstowym naměsće poswjećeny. Za swjedźeń běchu masowe sceny nazwučowali, kotrež po přikładźe Praskich spartakiadow na Młynkec łuce z wjele stami wobdźělnikami předstajichu. Mjez nimi bě scena šulerjow, na kotrejž sym so jako šuler 7. lětnika Worklečanskeje šule wobdźělił. Na dalšej scenje wšeje serbskeje młodźiny wobdźělichu so tež młodostni z Noweje Wjeski.

Wot myslički k woprawdźitosći

Towarstwo Njepilic dwór so schadźowało

Montag, 31. Juli 2017 geschrieben von:

Rowno (JoS/SN). Přihoty za program na 18. dworowym swjedźenju na Njepilic statoku 24. septembra stejachu w srjedźišću hłowneje zhromadźizny spěchowanskeho towarstwa Njepilic dwór minjeny pjatk w Rownom. Program je jasny a wšitcy­ čłonojo su přihłosowali. Předsyda Manfred Nikel bě zwjeseleny, zo njeje so na zhromadźiznje ničo dlijiło. „Najwažniše wšak je sej nadawki a zamołwitosće za tajke zarjadowanje porjadnje rozdźělić“, wón rjekny. „Smy z nazhonjenjow wuknyli a našim čłonam plan předpołožili, kotryž lětnje wospjetujemy. Tak kóždy z pomocnikow wě, kak móže towarstwo skutkownje podpěrać.“

Program 18. dworoweho swjedźenja na Njepilic statoku 24. septembra nawjazuje najprjedy raz na znate z minjenych lět. Budu to dwurěčna bohosłužba, burske wiki ze serbskim wobjedom a rańše piwko z hudźbu. Popołdniši program steji pod hesłom „Bajkojte na Njepilic statoku“ z hosćimi z Barbuka, Ćiska a z čěskeje strony Rudnych horin. Pobrachować njesmědźa wězo chowancy Rownjanskeje Witaj-pěstowarnje „Milenka“ kaž tež Serbskeho dźěćaceho a młodźinskeho ansambla Slepo.

Za sport a dźiwadźelenje so horił

Donnerstag, 20. Juli 2017 geschrieben von:

Spěšnje je so zrudźaca powěsć po Serbach roznjesła, zo je znaty Worklečan Jurij Bětka wutoru nimale 80lětny zemrěł.

Krótko do kónca Druheje swětoweje wójny je 17. nowembra 1938 we Worklecach narodźeny Jurij Bětka do tamnišeje šule zastupił. Po wójnje wučachu tam předewšěm tak mjenowani nowowučerjo, mjez nimi Marja Žurowa a Józef Bajtl. Wot 7. lětnika chodźeše Jurij w durinskim Heiligenstadće do šule.

Po złoženju matury 1956 dźěłaše najprjedy na Kamjenskim zarjedźe za wuměrjenje kraja. Tehdy je tež hač do hód 1958 w prěnim mustwje SJ Hórki kopańcu hrał. Po ćežkej chorosći dyrbješe z aktiwnej kopańcu přestać. Je pak jako sudnik w prěnjej wokrjesnej klasy hwizdał.

Wot lěta 1960 do 1963 je so na inženjerskej wysokej šuli w Drježdźanach na inženjera za wuměrjenje kraja kwalifikował. Po tym dźěłaše hač do 1987 w Budyšinje. Powědaše mi jónu, kajke wužadanje to za nich bě, jako dyrbjachu při twarje tehdyšeho wysokodoma wěže za lifty na milimeter dokładnje wuměrić.

Nimale połdra tysaca podpismow

Montag, 17. Juli 2017 geschrieben von:

Zběranje podpismow za wobydlersku iniciatiwu Federalistiskeje unije europskich narodnych mjeńšin (FUEN) Minority SafePack derje postupuje. Tež serbske towarstwa a jednotliwcy pilnje podpis­ma zběraja.

Čerstwy wětřik

Donnerstag, 13. Juli 2017 geschrieben von:
Domowina w Delnjej Łužicy čuje so posylnjena. Wona ma zaso zastupjerja ze swojich rjadow we wjednistwje třěšneho zwjazka. To pak njeje wšitko. Za městopředsydu wuzwoleny Wylem Janhoefer, kiž je zdobom župan župy Delnja Łužica, je ze swojimi 25 lětami hišće dosć młody. Runje tole Delnich Serbow tak euforizuje, kaž sym to wčera za Serbskim blidom w Choćebuzu sam pytnył. Młodostni so za skutkowanje w Domowinje zajimuja a so gratu přimaja, swoje mysle a namjety přinošuja a wo nich diskutuja. To je čerstwy wětřik, na kotryž su mnozy čakali. Tón wšak njewuchadźa jeno z Wylema Janhoefera. Tež dalši młodźi ludźo so tam sylnje­ angažuja, kaž na přikład zastupowacy jednaćel Domowiny Marcus Kóńcaŕ abo čłonka zwjazkoweho předsydstwa Jenifer­ Dünnbierowa. Dobry zakład to do přichoda­ a tež generaciskeje změny. Wužiwajmy­ šansu! Janek Wowčer

Nowi w zarjedźe

Mittwoch, 05. Juli 2017 geschrieben von:

Choćebuz (SN/JaW). Domowinski běrow kaž tež wotnožka Załožby za serbski lud w Choćebuzu matej wot spočatka tydźenja štyrjoch nowych sobudźěłaćerjow.

Kaž wobkrući našemu wječornikej zastupowacy jednaćel třěšneho zwjazka Marcus Kóńcaŕ, je spočatk měsaca Heike Apeltojc zastojnstwo jako nowa regionalna rěčnica za Delnju Łužicu nastupiła. Wona naslěduje Utu Henšelowu, kotraž nawjeduje wot spočatka februara Choćebusku Šulu za delnjoserbsku rěč a kulturu. Apeltojc ma prěnjorjadnje wudźeržować zwiski k delnjołužiskim gmejnam we wokrjesomaj Hornje Błóta-Łužica a Dubje-Błóta kaž tež k Domowinskim skupinam a towarstwam na teritoriju župy Delnja Łužica.

Dalšej nowaj sobudźěłaćerjej we wobłuku projektoweho skutkowanja Domowiny staj Katrin Šwjelina a Gerald Schön. Wonaj starataj so hač do kónca lěta­ wo projektowe dźěło, předewšěm na polu kultury. Tohorunja wot spočatka julija dźěła w Choćebuskej wotnožce Załožby za serbski lud Irina Henšelowa. Wona je wotnětka zamołwita za institucije a wobdźěłanje projektow.

Domowinski pokal do Rogozna

Mittwoch, 05. Juli 2017 geschrieben von:
Hochoza (HA/SN). Hižo 20. raz za sobu je župa Delnja Łužica přewjedła swój koparski turněr wo Domowinski cup. Sydom mustwow – pjeć muskich a dwě žonjacej – zetka so k tomu minjenu sobotu w Hochozy. Hrajny modus bě tajki, zo dyrbješe kóžde z nich znajmjeńša jónu přećiwo sebi nastupić. Po dohromady 21 partijach bě skónčnje jasne, štó lětsa pokal župy dóstanje. Cyłk młodych Domowinskich čłonow z Rogozna (Willmersdorf) doby před Dešnjanami a Hochožanami. Pola žonow běchu koparki z Hochozy na kóncu lěpše hač mustwo z Rogozna. Jasne nětko je, zo budźe přichodny koparski turněr wo pokal Domowiny klětu w Rogoznje.

Skupinu njerozpušćić

Dienstag, 04. Juli 2017 geschrieben von:
Wětošow (SN/JaW). Domowinska skupina Wětošow hrozy rozpadnyć. Přičina je pobrachowacy dorost. Předsydstwo bě so na njedawnym zetkanju dojednało, dźěło skupiny kónc lěta skónčić. Kaž wottam rěka, njejsu naslědnika za předsydu našli. „Hižo dlěje spytam zastojnstwo młódšemu přepodać, njenamakam pak nikoho za nje“, rjekny dotalny předsyda skupiny Milan Nowak Nowemu Casnikej. Dołho a na­drobnje su diskutowali, kak měło ze skupinu dale hić. Tuchwilu ma wona jědnaće čłonow, wjetšina su starši ludźo. Młódši su wokoło 50 lět a su połnje do powołanja zapřehnjeni. Mnozy skutkuja hižo w dalšich towarstwach. Třěšny zwjazk so nadźija, zo zamóža Wětošowscy Domowinjenjo rozpušćenje skupiny hišće wotwobarać. Snano móhli so z dalšej skupinu zjednoćić, kaž to hižo wjacore cyłki w Delnjej Łužicy praktikuja, rěka k tomu z Choćebuza. Kaž zastupowacy jednaćel Domowiny Marcus Kóńcaŕ potwjerdźi, chcedźa nazymu nadrobnje wo ćežach a móžnosćach rozmyslować.

Anzeige