Maja konkretne předstawy

Dienstag, 12. September 2017 geschrieben von:
Choćebuz (SN/at). Na wólbnym forumje Domowiny wčera wječor w Choćebuskim Serbskim domje su so direktni kandidaća za wólbny wokrjes 64 (Choćebuz/Sprjewja-Nysa) Birgit Kaufhold (Lěwica), Ulrich Freese (SPD), dr. Klaus-Peter Schulze (CDU), Jeff Staudacher (FDP), Wolfgang Renner (Zeleni), Helene Spring-Räumschüssel (AfD) a kandidat-jednotliwc Helmut Fleisch­hauer zwólniwi wuprajili, europsku wobydlersku iniciatiwu Minority SafePack podpěrać, mjenujo za to konkretne předstawy. Nimale­ 40 zajimcow słyšeše poziciju požadarjow nastupajo wot mjeńšinoweje rady poručeny plan naprawow za škit a spěchowanje awtochtonych ludowych skupin zwjazkoweho knježerstwa kaž tež k nowelěrowanju zakonja wo změnje mjeńšinowych mjenow, štož měło Serbowkam zmóžnić swoje mjeno serbsce do personalnych dokumentow zapisać dać. Hłownje zwěsćena přezjednosć nastupajo serbske temy w kompleksu k strukturnej změnje we Łužicy hižo njebě, tu jewjachu so bóle stronske pozicije.

Podpěruja Minority SafePack

Montag, 11. September 2017 geschrieben von:

Chrósćicy (KJu/SN). Domowinska župa „Michał Hórnik“ podpismowu akciju europskeje wobydlerskeje iniciatiwy Minority SafePack podpěruje a budźe k tomu přinošować, zo třěšny zwjazk Domowina bohatu ličbu podpismow nazběra. Najlěpšu składnosć za to skića hłowne zhromadźizny kaž tež kónclětne zarjadowanja Domowinskich skupin a towarstwow, měnjachu čłonojo župneho předsydstwa na swojim posedźenju minjeny štwórtk w Chrósćicach.

Gremij bilancowaše lětuše župne kaž tež dotalne zarjadowanja župje přisłušnych towarstwow a skupin. Předewšěm spontane předewzaće, projektny dźeń składnostnje 100. posmjertnych narodnin basnika Jurja Chěžki zhromadnje z Chróšćanskej zakładnej šulu, hódnoćachu jako jara pozitiwne.

Wo wokrjesnej reformje rěčeli

Freitag, 08. September 2017 geschrieben von:

Choćebuz (HA/SN). Dwě za dalše wuwiće serbstwa w Delnjej Łužicy wažnej prašeni steještej w srjedźišću schadźowanja předsydstwa Domowinskeje župy Delnja Łužica w Choćebuzu. Na zeńdźenju wobdźěleni běchu srjedu předsyda Domowiny Dawid Statnik kaž tež dalši čłonojo zwjazkoweho předsydstwa.

Witaja podpěru Maćicy Serbskeje

Donnerstag, 07. September 2017 geschrieben von:

Slepo (SN/at). Předsydstwo Maćicy Serbskeje je wutoru w Slepjanskim kulturnym centrumje wuradźowało, zo by so z prěnjeje ruki wo kónčinje wobhoniło. Kaž čłonka předsydstwa Janka Pěčkec de Lévano zdźěli, rozmołwjachu so Maćicarjo z fararku Slepjanskeje wosady Jadwigu Malinkowej a županom župy „Jakub Lorenc-Zalěski“ Manfredom Hermašom.

Hotuja so na diskusiju

Donnerstag, 31. August 2017 geschrieben von:

Wojerecy (SN/JaW). Wo přihotach na podijowu diskusiju z kandidatami za wólby zwjazkoweho sejma w Budyšinje a Choćebuzu zhonichu wčera čłonojo prezidija Domowiny we Wojerecach. „Za wobě zarjadowani smy přeprošenja rozesłali“, zdźěli předsyda Dawid Statnik na naprašowanje. Diskusiju w Budyšinje, 7. septembra we 18.30 hodź. w Serbskim domje, přewjedu zhromadnje ze Serb­skimi Nowinami. Dalšu, 11. septembra w 19 hodź. w Choćebuskim Serbskim domje, wotměja w swójskej režiji. Kaž Statnik dale zdźěli, je kandidat strony Die Partei Delnjoserb Torsten Mak, kiž je zdobom předsyda Rady za serbske nalěžnosće Braniborskeje, wobdźělenje terminowych prěkowanjow dla wotprajił.

Zaběrali su gremij wčera tohorunja naslědne wólby Rady za serbske naležnosće Sakskeje. Prezidij Domowiny namjetuje Chróšćanskeho wjesnjanostu Marka Klimana (CDU), čłona Zwjazkoweho předsydstwa Domowiny. Hižo do toho bě Sakski zwjazk městow a wsow Klimana namjetował, štož třěšny zwjazk wita.

Wo swójbnym popołdnju rěčeli

Donnerstag, 31. August 2017 geschrieben von:

Budyšin (SN/CoR). Nimo přihotow na kubłansku jězbu 23. septembra do Čěskeje bě tež nowemberske swójbne popołdnjo w Hodźiju tema wčerawšeho posedźenja předsydstwa Budyskeje župy „Jan Arnošt Smoler“. „Organizujemy hižo něšto lět swójbne zarjadowanje na wšelakorych městnach. Lětsa orientujemy so na Hodźij, dokelž chcemy tam jara angažowanych ludźi podpěrać“, rozłoži županka Jana Pětrowa. Hižo dlěši čas prócuja so wo to, na tamnišej zakładnej šuli ze serbskorěčnym poskitkom projekt 2plus zawjesć. „Gmejna a Hodźijski farar runje tak kaž Haslowska Domowinska skupina chcedźa nas pod­pěrać.“ NSLDź předstaji dwurěčny kruch a tamniša pěstowarnja přihotuje program. „Ze zakładnej šulu smy hišće w rozmołwje“, rjekny Pětrowa.

Dalša tema wčera běchu přirodowe wi­ki w Stróži 9. septembra. Tam chcetej so Smjerdźečanska rejwanska skupina a Sprjewjan wo serbsku naladu starać. Wječor do toho přeprosy towarstwo Radiška zhromadnje z biosferowym rezerwatom na serenadu w zelenym „W změnje časow“.

Składnostnje dźensnišich 107. posmjertnych narodnin Hanza Šustera swjećachu wčera na Trjebinskim Šusterec statoku dwurěčnu­ Božu słužbu z fararku Jadwigu Malinkowej a Manfredom Hermašom. Wobrubili su kemše mjez druhim Rowniske glosy. Po kemšach zanjese čěski ansambl Lidová muzika z Chrástu čěsku a mjezynarodnu hudźbu a měješe samo titul ze Serbskeho Slepjanskeho spěwnika w programje. Foto: Jost Schmidtchen

Stawizniska sekcija Maćicy Serbskeje běše wčera wječor do Budyskeho hosćenca „Wjelbik“ na akademiju ze sorabistiskej temu přeprosyła, kotraž přiwabi mnohich zajimcow. Abo běše skerje referent z dalokeho kontinenta kaž magnet skutkował?

Budyšin (CRM/SN). Dr. Alexander Maxwell, docent-stawiznar wysokeje šule Victoria University of Wellington w Nowoseelandskej, wědźeše wo městnje serb­šćiny w słowjanskim swěće dosć čile přednošować. Status serbšćiny dźě běše w zašłosći jara rozdźělnje rozjimowana tema. Tomu je tež dźensa dale tak, a to pod kontrowersnymi aspektami a chětro zwažliwymi metodami. Jedna so w serbšćinje wo dwaj abo samo wjacore dialekty a/abo wo dwě spisownej rěči?

Pojědu do Lubija

Mittwoch, 23. August 2017 geschrieben von:

Konjecy (SN/JaW). 26. dźeń Saksow změje dalši serbski programowy dypk. Serbski muski chór Delany pojědźe nětko tola do Lubija. Na wobdźělenje dojednachu so spěwarjo na swojej wčerawšej probje w Konječanskej Burskej stwě. Z programom 3. septembra připołdnju na jewišću Sakskeho krajneho sejma, hdźež budźe Serbowka Diana Fryčec-Grimmigowa moderěrować, wobdźěla so delanscy spěwarjo 25. króć na najwjetšim ludowym swjedźenju swobodneho stata. Zdobom pak předsydstwo towarstwa wčera připowědźi, zo wustupja Delenjo posledni króć we wobłuku Dnja Saksow.

Po tym zo bě lětuši zarjadowar, město Lubij, jeničkimaj za swjatk přizjewjenymaj serbskimaj lajskimaj ćělesomaj – muskemu chórej Delany a Slepjanskemu folklornemu ansamblej – minjeny tydźeń (SN rozprawjachu) wotprajił, je jimaj nawodnica jednaćelnje Dnja Saksow Simone Schröder-Kalbas wustup na jewišću krajneho sejma poskićiła. Domowina jako čłonka kuratorija Dnja Saksow bě so „wuprošenja“ dla hóršiła. Slepjenjo su minjene dny doskónčnje wotprajili, chór Delany pak do Lubija pojědźe.

Zastupuja Serbow w Bołharskej

Dienstag, 22. August 2017 geschrieben von:
Serbska rejwanska skupina Smjerdźaca je tuchwilu z hosćom na mjezynarodnym folklornym festiwalu w bołharskim Burgasu při Čornym morju. Rejwarki a rejwarjow přewodźeja tež wjacori hudźbnicy z Łužicy. Nimo nich předstaja so na festiwalu, kotryž bu wčera zahajeny, ansamble ze wšeje Europy, kaž tež z Indiskeje, Vietnama a samo ze Sudana. Zhromadnje z muzikantami prezentuja tam Smjerdźečenjo hišće hač do pjatka serbske reje a pěsnje. Foto: Gabriel Krawczyk

Anzeige

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson