Program prěni raz bjez Kantorkow

Dienstag, 27. September 2016 geschrieben von:

Mjeztym zo su minjeny pjatk na swjedźenskim zarjadowanju w Rownom na 70lětne skutkowanje Domowinskeje skupiny we wsy a na 250. narodniny Hanza Njepile spominali, steješe njedźela cyle w znamjenju dworoweho swjedźenja.

Rowno (JoS/SN). Najrjeńše nazymske wjedro je zawčerawšim, njedźelu, dworowy swjedźeń na Rownjanskim Njepilic statoku wobrubiło. Tam witachu kemšerjow po němsko-serbskej Božej słužbje na rańše piwko ze šalmajowej kapału, kotraž­ dotal žadyn dworowy swjedźeń skomdźiła njeje. Poněčim so dwór dale pjelnješe. Mnozy wopytowarjo přichadźachu tež z wokolnych wsow, wšako chcychu sej k wobjedu kulinariske wosebitostki kaž serbsku kwasnu poliwku a pražene swinjo słodźeć dać. Dobry wothłós žnějachu burske a rjemjeslniske wiki. Na nich bě mjez druhim hribowy fachowc Uwe Bartholomäus zastupjeny. Wón wšak wopytowarjam wjele nadźije činić njemóžeše, zo w zbywacym času poměrnje sucheho lěta hišće wjele kmanych jědźnych hribow namakaja.

Wjele za snadny fenk

Montag, 26. September 2016 geschrieben von:
Kulturny program z wosom serbskimi towarstwami a dalšimi jednotliwcami, k tomu słódnu wječer z regionalnymi wudźěłkami kaž tež reje z dujerskej hudźbu a młodej­ serbskej kapału dožiwichu zajimcy sobotu w Chróšćanskej „Jednoće“. A za to njetrjebachu scyła wjele płaćić. W předpředani płaćeše zastupny lisćik runje šěsć, při wječornej kasy wosom eurow. To je za telko poskitka snadny fenk! Po wšěm zdaću pak to tón abo tamny Serb hinak widźi, hewak by sobotu wječor w „Jednoće“ wjac ludźi było. Tajkele spodobne wjesne zarjadowanje je předewšěm sobuskutkowacym kulturnych cyłkow wulkotna składnosć tróšku zhromadnje swjećić. Mnozy z nich běchu swojich partnerow abo partnerki sobu přinjesli. Wjacori pak so ze wšelkich přičin po programje zaso na dompuć nastajichu­. Škoda, wšako tajke něšto kaž na Chróšćanskej župnej ker­mušce tak často­ nimaš. Janek Wowčer

Wulce poradźeny wječor

Montag, 26. September 2016 geschrieben von:

Kamjenska župa znowa kulturnu kermušku swjećiła

Chrósćicy (SN/JaW). Z někotrymi překwapjenkami a nowosćemi wabješe župa „Michał Hórnik“ hosći na kermušu so­botu do Chróšćanskeje „Jednoty“. Ně­hdźe 200 ludźi bě přišło, byrnjež so ze zarjadowanjemi tón dźeń znowa kopiło, kaž županka Zala Cyžowa při witanju přispomni.

Jedna z překwapjenkow bě, zo je prěni serbski dudlowar Beno Nowak wšitkich při zachodźe witał, hrajo znate serbske pěsnički. To pak njeběše jenička nowosć. K wječeri njesydachu pomfritki, rězk abo gulaš, ale słódne regionalne wudźěłki ze swinjorězanja, twaroh změšany z lanym wolijom, pomazki, butra a kisałe kórki. Kóždy hósć smědźeše so po swojej woli posłužować, štož sej mnozy jako dobru ideju pohosćenja chwalachu.

Třeći raz wulki wuspěch žnjeli

Montag, 19. September 2016 geschrieben von:

Chróšćenjo znowa z najrjeńšej žnjowej krónu Sakskeje

Torgau/Chrósćicy (JK/SN). Sakska krajna domchowanka, kotraž so wčera w Torgauwje zakónči, bě za Chróšćanske wjesne towarstwo Domizna zawěrno wjeršk lětušeho towarstwoweho žiwjenja. Třeći raz, po tym zo běchu hižo lěta 2009 w Biskopicach a 2012 w Sebnitzu najrjeńšu žnjowu krónu Sakskeje předstajili, je so próca mnohich pomocnikow tež lětsa zaso­ wulce wudaniła.

Kowar za jednaćela powołany

Montag, 19. September 2016 geschrieben von:

Choćebuz (SN/JaW). Marko Kowar budźe nowy jednaćel Domowiny. Wón přewo­zmje zastojnstwo 1. januara 2017 po Bjarnaće Cyžu, kiž poda so kónc lěta na wuměnk. To je Zwjazkowe předsydstwo Domowiny sobotu w Choćebuzu wobzamknyło. Městno Kowarja so wupisa.

Chcedźa z Maćicu wušo hromadźe dźěłać

Donnerstag, 15. September 2016 geschrieben von:

Čłonojo předsydstwa Maćicy Serbskeje su so wčera w Choćebuzu zetkali. Na posedźenju wobdźěli so tež tamniši generalny superintendent Martin Herche. W srjedźišću wuradźowanja steješe połoženje ewangelskich Serbow w Delnjej Łužicy.

Choćebuz (ap/SN). Je hižo wjele lět z tradiciju, zo zetka so předsydstwo Maćicy Serbskeje jónu wob lěto w Delnjej Łužicy. Tam zeznajomja so z dźěławosću jed­neje serbskeje institucije abo serbskeho towarstwa. Tohodla wotmě so srjedowne posedźenje předsydstwa w Choće­buskim ewangelskim centrumje hromadźe z předsydstwom delnjoserbskeje Maśicy Serbskeje a z předsydstwom Spěchowanskeho towarstwa za serbsku rěč w cyrkwi.

Přistup k CIOFF wobzamknyli

Donnerstag, 15. September 2016 geschrieben von:

Janšojce (HA/SN). Hromadźe z wjesnymi zastupjerjemi je předsydstwo župy Delnja Łužica wčera w Janšojcach wuspěšny festiwal serbskeje kultury wuhódnoćiło, na kotryž móžachu před štyrjomi tydźenjemi něhdźe 8 000 wopytowarjow w tejle delnjołužiskej wsy witać. Wutrobnje dźakowaše so župan Harald Koncak tamnišej­ Domowinskej skupinje, wjesnej młodźinje a mnohim dalšim pilnym pomocnikam. We wsy samej běchu ideju zrodźili, wuhotować swjedźeń składnostnje 70lětneho wobstaća Domowiny w Delnjej Łužicy a 25. róčnicy załoženja tamnišeje župy. Mjez druhim z erta šefowki Janšojskeje młodźiny Silvy Oehlertojc su čłonojo předsydstwa zhonili, zo sej wjesnjenjo swjedźeń jara chwalachu, wo­sebje pokazanych serbskich nałožkow a mnóstwa narodneje drasty dla.

Kaž předsydstwo wčera wobzamkny, přistupi župa Delnja Łužica mjezynarodnej organizaciji za přewjedźenje folklornych festiwalow CIOFF, kotrejž Domowina hižo přisłuša. Dotal je mjeztym rozpušćeny rejwanski ansambl Pśijaśelstwo Delnju Łužicu tam zastupował.

Wojerowsku župu šěsć lět aktiwnje nawjedował

Donnerstag, 15. September 2016 geschrieben von:

Tyšna powěsć je nas docpěła, zo je wučer a bywši župan župy „Handrij Zejler“ Jurij Nuk po ćežkej chorosći 2. septembra we Wojerowskej chorowni zemrěł. 20. oktobra 1926 bě so wón w Dobrošicach pola Njeswačidła małoratarskej swójbje narodźił. Po nawróće z jendźelskeje wójnskeje jatby poda so 1947 na Serbski wučerski wustaw w Radworju.

Jurij Nuk wučerješe najprjedy na wšelakich šulach Budyskeho wokrjesa, kaž w Bolborcach a Koblicach. 1952 přińdźe jako wučer do Brětnje a podawaše tam tež serbšćinu. Kaž hižo dotal je wón tohorunja w Brětni aktiwnje w Domowinskej skupinje skutkował, na čož wuzwolichu jeho za předsydu. Lětdźesatki zwjazowaše rodźeneho Dobroščana wuska zhromadnosć z Brětnju, hačkuli bě tam jeno tři lěta wučerił.

Podpěruja skupinu Ćisk

Dienstag, 13. September 2016 geschrieben von:

Leppersdorf (SN). Serbska ludowa rejwanska skupina Ćisk je mjez tymi dźesać projektami, kotrež je firma Sachsenmilch we wobłuku zhromadnje z rozhłosowym sćelakom Hitradio RTL wotměwaceje so akcije „Sylnje za Saksku/Stark für Sachsen“ wuzwoliła. Sachsenmilch podpěruje 5. dworowy swjedźeń w Ćisku přichodnu sobotu mjez druhim z wulkej porciju twaroha, zo by skupina na jednym z wuzwolenych statokow typisku łužisku jědź, twaroh z lanym wolijom, přihotować móhła. Pokładnik Ćišćanskich rejwarjow Wolfgang Finger je dobropis za to dóstał.

„Chcemy angažowanym ludźom móžnosć dać, swoje projekty šěršemu publikumej předstajić. To płaći wosebje za projekty, kotrež hewak wulce wobkedźbowane njejsu. Z akciju chcemy angažowanym ludźom swoje připóznaće zwuraznić a so prosće dźakować, wšako njeje jich zasadźenje samozrozumliwe“, rozłožuje marketingowa nawodnica Leppersdorfskeje firmy Sachsenmilch Annett Stang w zdźělence.

Wjace towarstwow w župje

Freitag, 09. September 2016 geschrieben von:

Před 70 lětami su Domowinu za Delnju Łužicu załožili. Dokładnje na historiskim dnju 8. septembra zetkachu so wčera Domowinjenjo a dalši w Choćebuskim Serbskim domje, zo bychu na wažny podawk dopominali.

Choćebuz (HA/SN). Historikar Serbskeho instituta dr. Pětš Šurman přednošowaše wo tym, kak bě k załoženju delnjołužiskeje Domowiny pola Lažkojc we Wjerbnje přišło. 30 dowěrnikow ze wšelakich wsow so tam tehdy zetka a je demokratisce prěnje předsydstwo wuzwoliło. Hornjoserbski prawiznik Jurij Rjenč załoženje sobu podpěrowaše, a Choćebuska sowjetska komandanturu to dowoli. Hakle 1949 dósta Domowina w Delnjej Łužicy wot braniborskeho knježerstwa oficialnu dowolnosć, zo smě skutkować. Spočatk bě njesměrnje ćežki, jeničce 140 z tehdy něhdźe 20 000 Domowinjanow bě z Delnjeje Łužicy, dwě lěće pozdźišo bě jich hižo 1 065 čłonow mjez 14 600.

Z přikładami referent pokaza, kak bě Domowina w Delnjej Łužicy wot wšeho započatka sobu wobwliwowała, zo su narodnostnu politiku w Braniborskej a pozdźišo we wobwodźe Choćebuz zwoprawdźili. Často njebě to runjewon lochko.

Anzeige