Kruta zepěra wjesneho žiwjenja

Freitag, 30. Dezember 2016 geschrieben von:

Konjecy (JK/SN). Jedna z najaktiwnišich Domowinskich skupin Kamjenskeje župy „Michał Hórnik“ je ta w Konjecach-Šu­nowje. Bjez podpěry a idejow Domowinjanow njebychu zarjadowanja we wsy to byli, štož hižo přez lěta su: Wone skrućeja a wuwiwaja wjesnu zhromadnosć. Nje­zadźiwa tuž, zo je so wčera wječor w Konječanskej burskej stwě zetkała nahladna ličba čłonow k lětušej hłownej zhromadźiznje. Hižo k za­zběhej pokaza so wuspěšne dźěło z dźěćimi a młodźinu. Dźěći z Konjec a Šunowa předstajichu derje nazwučowanu bajku wo Bremenskich mu­zikantach. Tu běchu tež popołdnju rentnarjam wobeju wsow předstajili. Za to žnějachu akterojo pod nawodom Eriki Maywaldoweje wutrobny aplaws.

Haja rjanu „kónclětnu“ tradiciju

Freitag, 30. Dezember 2016 geschrieben von:

Nowa Wjeska (SN). Na mjeztym hižo 41. škotowy turněr je wčera wječor předsyda Nowowješćanskeho towarstwa Wjesna zhromadnosć Křesćan Korjeńk zajimcow na zhromadne kartyplacanje witał. Tradicija saha do NDRskeho časa, jako běchu w tehdyšim Čórlichec wjesnym hosćencu młodostni mysličku zrodźili, so mjez hodami a Nowym lětom k zabawnemu škotowanju zetkać. Mjeztym zo hišće někotre lěta tam karty placachu, činjachu to po zawrjenju hosćenca 1987 w priwatnych rumnosćach a we Worklečanskim hosćencu. Nětko pěstuja swoju tradiciju we wjesnym towarstwowym domje.

Koncert je najwjetše wudobyće

Donnerstag, 22. Dezember 2016 geschrieben von:

Wojerecy (SN/JaW). Lěto 2016 bě za župu „Handrij Zejler“ jara wuspěšne. To zdźěli regionalna rěčnica Domowiny za teritorij Wojerowskeje župy a rěčnica tamnišeho předsydstwa Christina Šołćina na naprašowanje SN. „Smy jubilejne lěto Jurja Brězana a Jana Arnošta Smolerja z mnohostronskimi projektami a aktiwitami přewodźeli“, wona rjekny. Tak wotmě župa wjacore projekty mjez druhim ze šulerjemi Kulowskeje Krabatoweje kaž tež Wojerowskeje Handrija Zejlerjoweje šule na wšelakich městnach, hdźež zeznajomichu so dźěći ze skutkowanjom a skutkowanišćom Brězana. Dźakowna je župa spisowaćelej Benej Budarjej kaž tež Serbskemu šulskemu towarstwu za wulku podpěru. „Wuzběhnyć chcyła lětuše 3. swójbne popołdnjo, kotrež bě přewšo wuspěšne. Wosebje chwalili su sej wopytowarjo dobru atmosferu mjez młódšej a staršej generaciju kaž tež serbskeho dudlowarja Bena Nowaka z Róžanta, kiž pohnu hosći k spěwanju serbskich pěsnjow.“ Tež na projekće župow na temu Krabat bě Wojerowska z wjace hač 70 dźěłami, kotrež tež myta dóstachu, šěroko zastupjena.

Pawk skruća swoje čłonstwo

Montag, 19. Dezember 2016 geschrieben von:

Serbske młodźinske towarstwo Pawk je sobotu w Radworju dźěławosć minjenych měsacow bilancowało a wuhibki za skutkowanje w nowym lěće stajiło.

Radwor (SN). Z halowej kopańcu kónc januara startuje młodźinske towarstwo Pawk do noweho lěta. Na to su so čłonojo cyłka na swojej sobotnej hłownej zhromadźiznje w Radworju dorozumili. 15 čłonow bě na nju do „Słodeńka“ přichwatało, kaž předsydka towarstwa Franciska Grajcarekec Serbskim Nowinam zdźěli.

Klětu čakaja nowe wužadanja

Montag, 19. Dezember 2016 geschrieben von:

Smjerdźečanska rejwanska skupina hłownu zhromadźiznu přewjedła

Smjerdźaca (aha/SN). Na samsnym městnje, hdźež čłonojo Smjerdźečanskeje rejwanskeje skupiny hewak kóždu sobotu pilnje zwučuja, zetkachu so woni zawčerawšim k hłownej zhromadźiznje. Wjace hač 50 čłonow móžeše předsyda towarstwa Gabriel Krawc do tamnišeho kulturneho domu witać.

Na adwentničce lajkojo znowa dźiwadźelili

Montag, 19. Dezember 2016 geschrieben von:

Jaseńca (LZ/SN). Při słónčnym zymskim wjedrje zetkachu so Jasčenjo zawčerawšim k swojej adwentničce. Starši a młódši běchu do kulturneho doma přichwatali. W rjenje wupyšenej a wutepjenej rumnosći hižo za bunjacym kofejom wonješe. Po witanju a někotrych informacijach předsydy towarstwa Bjesada dachu sej wšitcy kofej a wosušk zesłodźeć. Tež lětsa zaso dujerjo Njeswačanskeje wosady přitomnych­ z rjanymi dohodownymi a zymskimi melodijemi zawjeselichu.

Bjarnat Cyž dźe na wuměnk

Freitag, 16. Dezember 2016 geschrieben von:
Jednaćel Domowiny Bjarnat Cyž je so dźensa w Budyšinje na wuměnk rozžohnował. Zastupjerjo Domowinskeho zarjada a dalšich serbskich institucijow dźakowachu so jemu za njesprócniwe dźěło. Mjez druhim zaspěwachu jemu sobudźěłaćerjo Domowinskeho zarjada a Rěčneho centruma WITAJ samozbasnjenej spěwaj. Předsyda Do­mowiny Dawid Statnik (nalěwo) přepoda Bjarnatej Cyžej dźakne myto „Slěborny dudak­“. Foto: SN/Maćij Bulank

„Doba“ so nachila

Freitag, 16. Dezember 2016 geschrieben von:
Hłowny jednaćel Domowiny Bjarnat Cyž bu dźensa na wuměnk rozžohnowany. Tak nachila so „doba“ w stawiznach třěšneho zwjazka. Z Bjarnatom Cyžom woteńdźe njesprócniwy dźěłaćer na dobro našeho ludu, kotryž je popřewrótowu serbsku politiku bytostnje sobu postajał. W njeměrnych a wichorojtych časach na kóncu NDR přewza wón zastojnstwo předsydy Domowiny. Jeho cil: reformy a womłodźenje, třěšny zwjazk pak njerozbić. To je docpěł. Z krutym rjapom a njepowalnje je Cyž Domowinu přez tele ćežke časy wjedł, kotraž steji dźensa kruta a njepowalna. Dźakowano mjez druhim Cyžej dóstawamy dźensa statne spěchowanje. Wón je tole z aktowej noticu w zjednoćenskim zrěčenju sobu nastorčił. A nětko? Kaž rjekny Serbskim Nowinam, je Domowina za přichodne lěta přihotowana a wón budźe jej dale z radu poboku. Přiwšěm pak wostanje wulka dźěra. Janek Wowčer

Přichod towarstwa rozjimali

Mittwoch, 14. Dezember 2016 geschrieben von:

Pod hesłom „Kak dale ze ZSW?“ planuje Zwjazk serbskich wuměłcow přewjesć w nowym lěće forum z čłonami towarstwa kaž tež ze wšitkimi za wuměłstwo a kulturne dźěło so zajimowacymi, předewšěm młodymi ludźimi.

Budyšin (AW/SN). Předsydstwo Zwjazka serbskich wuměłcow je wčera w Haslowje wo přichodźe swojeho towarstwa wuradźowało. Dotalne předsydstwo pod nawodom Istvána Kobjele, kotrež ma po rozsudźe hłowneje zhromadźizny z nowembra w Haslowje hač do kónca apryla 2017 dale skutkować, rozjimowaše předewšěm prašenje, kak móhli młodych kandidatow za nowe předsydstwo cyłka zdobyć. Tohodla bě tež Budyšan Bosćan Nawka do wuradźowanja zapřijaty. Wón bě so na zašłej hłownej zhromadźiznje zwólniwy wuprajił w nowym předsyd­stwje sobu dźěłać.

Přitomni so tuž wčera dojednachu, bórze po Nowym lěće w Budyšinje přewjesć z čłonami ZSW a ze wšitkimi zajimcami za wuměłstwo a kulturne dźěło, předewšěm młodymi ludźimi, forum pod hesłom „Kak dale ze ZSW?“. Chcedźa nowe ideje za dalše spomóžne skutkowanje wuspěšneho serbskeho towarstwa zezběrać a zdobom młodych Serbow za sobudźěło zahorić.

Ze sobu rěčeć pomha

Mittwoch, 14. Dezember 2016 geschrieben von:
Zwjazk serbskich wuměłcow chce w nowym lěće přewjesć forum na temu: Kak dale ze ZSW? Hižo na zašłej hłownej zhromadźiznje je towarstwo tole tematizowało. Tam dyrbjach nazhonić, zo je tež we wuspěšnych a aktiwnych ćělesach ćežko přede­wšěm młodych ludźi za čestnohamtske skutkowanje zdobyć. Znaju situaciju skerje ze spěwnych cyłkow, kaž z muskeho chóra Delany, hdźež starosćimy so runje tak wo dorost a dalewobstaće. Dyrbimy pak přiznać, zo jedna so wo powšitkowny towaršnostny zjaw, kotremuž mamy znapřećiwić. Mam tuž za prawe a spomóžne, zo so ZSW na zjawnosć wobroća. Hač změje na te wašnje wočakowany wuspěch, njemóže wězo nichtó rjec. Ale, zo budu na forumje zjawnje wo naležnosći rěčeć a wupuć pytać, njemóže hižo nichtó prěć. Rěčeć měli tohorunja dalše cyłki ze sobu, mjez druhim Domowina a Serbski sejm. To móže jenož pomhać! Janek Wowčer

Anzeige