Lajska dźiwadłowa skupina Šunow-Konjecy hotuje so na premjeru

Konjecy (SN/CoR). Nimale lěto hižo zwučuja nowy kruch, nětko pak je za čłonow Serbskeje lajskeje dźiwadłoweje skupiny Šunow-Konjecy horca faza zaběžała. Štyri zwučowanske terminy wostanu hišće po wčerawšej probje na Konječanskej starej šuli, doniž kriminalnu komediju „Wumrěć njedawa, ćeta“ 7. nowembra w Šunowskej Fabrikskej hospodźe njepředstaja. Trochu chwile tak hišće maja zo móhli zhromadnje z režiserku Petru-Mariju Bulankec-Wencelowej na poslednich korekturach dźěłać. Zakład toho je, hdyž přispomnjenja režiserki w přestawce nimale cyłu stronu pjelnja – inklu­ziwnje chwalbow. „Sym jara spokojom z probowym stawom. Koncentracija je w kónčnym spurće přeco wjetša. Kóždy wě, zo so premjera bliži a ma sej doma swoju rólu tak nadźěłać, zo so woprawdźe wěsty čuje“, rjeknje dźiwadźelnica Budyskeho NSLDź, kotraž delansku skupinu mjeztym šěsć lět wuměłsce nawjeduje. Nowy kruch je třeća zhromadna produkcija.