Berlin/Drježdźany (dpa/SN/JK). Rozri­sanje problema ćěkancow njehodźi so po słowach zwjazkoweje kanclerki An­gele Merkel (CDU) jenož w Němskej abo Europje rozrisać. Zo by so jich ličba pomjeńšiła, je trjeba zwonka mjezow Europskeje unije jednać. Wjele ludźi nastaja so z Turkowskeje do krajow EU. Tohodla poda so kanclerka njedźelu do Istanbula, zo by so tam z turkowskimi zamołwitymi k aktualnemu stawej ćěkancow dla dorozumiła. W Němskej ma so po słowach kanclerki wjace hibać nastupajo wróćosłanje ludźi bjez wuhlada na azyl.

Wicekancler Sigmar Gabriel je wospjet kritizował namjet Angele Merkel, zarjadować tak mjenowane transitne pasma. Wón je zwólniwy naprawy sobu zamołwić, ale jenož tajke, kotrež tež woprawdźe rozrisanju krizy ćěkancow dla tyja.

K transitnym pasmam wupraji so tež předsyda frakcije Lěwicy w Sakskim krajnym sejmje Rico Gebhardt. Wón sej žada: „Krajne knježerstwo měło so populistiskeje politiki symbolow wzdać a město toho nadawki w kraju spjelnić, kaž ćěkancow porjadnje zaměstnić a z woby­dler­stwom sprawnje a wotewrjenje rěčeć.“