Choćebuz (HA/SN). Dźensa wječor wotewru w Choćebuskim statnym dźiwadle 25. mjezynarodny festiwal wuchodoeuropskeho filma, kotryž traje hač do njedźele, 8. nowembra. Hižo do oficialneho zahajenja pak su wčera wječor pokazali prěnje dwaceći z dohromady dwěsćě filmow ze štyrceći krajow, kotrež budu na jubilejnym festiwalu widźeć. Hižo 13. raz předstajichu krótke produkcije filmowcow-amaterow z Delnjeje Łužicy, Braniborskeje, Berlina a ze Sakskeje.
Něhdźe 500 přihladowarjow je dwuhodźinski program w Choćebuskim historiskim kinje „Weltspiegel“ dožiwiło. Zwjetša młodźi amaterojo wobjednowachu jara pisanu tematisku paletu, mjez druhim nawal ćěkancow, lubosć, ničenje přirody a problemy z modernej komunikaciskej techniku.