Kniha wo prawach mjeńšin

Njebjelčicy/Budyšin. „Mjeńšinowe prawo je čłowjeske prawo“ rěka kniha dr. Petera Kroha, kotruž awtor tónle tydźeń hnydom dwójce předstaji. Jutře, srjedu, přeprosy Njebjelčanska Domowinska skupina na čitanje z knihi a na diskusiju. To budźe w gmejnskej rumnosći na Hłownej dróze 9. Zajutřišim, štwórtk, 17. měrca, w 19.30 hodź. budźe dr. Peter Kroh z hosćom w Budyskej Smolerjec kniharni a poda tam swoje serbske mysle k politiskej kulturje Němskeje a Europy, kaž w přeprošenju rěka.

Pěstowarnja wočini durje

Němcy. Serbske šulske towarstwo přeprosy jutře, srjedu, na dźeń wotewrjenych duri do swojeje Němčanskeje Witaj-pěstowarnje. Wot 15.30 do 18 hodź. móža sej zajimcy rumnosće kubłanišća wobhladać a so tam z projektom Witaj zeznajomić. Dźěći móža w tym času jutrowne jejka debić a sej hrajkać. Při kofeju a tykancu budu so wopytowarjo ze staršimi dźěći, kotrež pěstowarnju wopytuja, rozmołwjeć móc. W 16 hodź. přednošuje dr. Jana Šołćina wo lěpšinach dwu- abo wjacerěčneho kubłanja w pěstowarni a šuli. Zastaranje dźěći za čas přednoška budźe zawěsćene.

Na kofej do muzeja