9. zetkanje sakskich dźiwadłow zahajene

Budyšin (SN/CoR). „Dźiwadło wotwěra durje k druhim kulturam, kaž tule NSLDź k serbskej. Wone tyje wuwiću wosoby, moraliskej kompetency a kmanosći, kritiski być“, wuzběhny sakski ministerski prezident Stanisław Tilich (CDU) wčera na zahajenju 9. sakskeho dźiwadłoweho zet­kanja w Budyskim Němsko-Serbskim ludowym dźiwadle po serbskorěčnym powitanju. Něhdźe 300 přihladowarjow móžeštaj hosćićelej intendant NSLDź Lutz Hillmann a zastupjerka intendanta za serbske dźiwadło Madleńka Šołćic witać, mjez nimi zapósłancow zwjazkoweho a sakskeho krajneho sejma Marju Michałkowu­ (CDU), Hajka Kozela (Lěwica) a Patriciju Wissel (CDU), předsydu sakskeho kulturneho senata Christiana Schramma, Budyskeho financneho měšćanostu dr. Roberta Böhmera kaž tež intendantow, dramaturgow a dźiwadźelnikow z cyłeje Sakskeje. „Budyšin hori so za dźiwadło a politikarjo so k njemu wuznawaja“, podšmórny Budyski krajny rada a nošer institucije Michael Harig (CDU).