Serbski institut přihotuje konferencu w chinsko-kanadiskej kooperaciji

Budyšin (SN/CoR). Pod hesłom „Dimensije kulturneje wěstoty w etniskich a rěčnych mjeńšinach“ wotměje so wot 17. do 19. nowembra w Budyskim Serbskim domje mjezynarodna wědomostna konferenca Serbskeho instituta.

Wjace hač 20 slědźerjow z Chiny, Kanady, Pólskeje, Awstriskeje, Słowakskeje, Boliwiskeje, Francoskeje, Čěskeje a Němskeje wobdźěla so na zarjadowanju. Woni wuměnja swoje dopóznaća wo kulturnej wěstoće z wida politiki, stawiznow, kulturnych wědomosćow, antropologije, linguistiki a geografije mjez sobu. Kompleksnu tematiku chcedźa na konkretnych mjeńšinowych přikładach z Europy, Kanady, Aziskeje a Łaćonskeje Ameriki předstajić. Aspekty kaž su to statna stabilita, stworjenske procesy statow, mjeńšinowe prawa a institucije, sydlenski rum a zhubjene domizny, wobchadźenje z kulturnym herbstwom a rewitalizacija mjeńšinoweje rěče při tym wažnu rólu hraja. Krajna direkcija Swobodneho stata Sakskeje mjezynarodnu konferencu financnje podpěruje.