Wona wuprudźa rozsudźenosć, energiju a přećelnosć. Začuwaš, zo so Annelie Schmuck dźěło w Serbskim ludowym ansamblu lubi. Jeje dźěłowu rumnosć pyša aktualne programowe plakaty kulturneje institucije. „Sym wot lońšeho junija w SLA přistajena, spočatnje jako asistentka, ale wot septembra 2015 jako sobudźěłaćerka za marketing.“

Na powabliwych plakatach ma 30lětna hižo swój idejowy podźěl. Wona widźi ze swojim marketingowym dźěłom wulke móžnosće kreatiwity na dobro zjawneje akceptancy SLA.

Młoda Němka je na wsy pola Weimara wotrostła. Je w tym měsće na Schillerowy gymnazij chodźiła a tam maturowała. Poda so na studij ludowědy, archeo­logije a pomnikoškita na uniwersiće w Bambergu, kotryž zakónči 2011 jako magister. Na to wobdźěli so dwaj měsacaj na archeologiskich wuhrjebanjach sydlišća z 9./10. lětstotka na egyptowskej kupje Elephantine. Po tym dźěłaše wosom měsacow w Muzeju bayerskich kralow w Hohenschangauwje na polu zjawnostneho dźěła.