Budyšin (SN/CoR). Zo dźěćace bajki k adwentnemu časej słušeja, je jasne; zo móžeš so z nimi tež wědomostnje zaběrać, mjenje. A hišće mjenje znate tule zawěsće je, zo ma samo rozestajenje z bajkami z feministiskeho wida na zapadźe lětdźesatki dołhe stawizny. To zbliži wčera něhdźe 30 zajimcam w nimale połnje wobsadźenej sydarni Serbskeho instituta Freiburgska ludowědnica prof. dr. Sabine Wienker-Piepho. Dr. Susanne Hozyna bě koleginu na polu powědanskeho slědźenja na posledni lětuši zjawny přednošk instituta přeprosyła. Docentka, kotraž reprezentuje komisiju za ludowe basnistwo při Société Internationale d’Ethnologie et de Folklore kaž tež bajkowu załožbu Waltera Kahna, wobradźi přitomnym na zakładźe swojich cyłe žiwjenje trajacych historisko-přirunowanskich slědźenjow wo bajkach zajimawu hodźinku połnu humora, w kotrejež srjedźišću steješe Popjelawka. Bajka słuša k dźesać „zakładnym bajkam“, kotrež po cyłym swěće we wšelakorych – tež muskich – wariantach nadeńdźeš.